Kala 2 hadzin nočy na śpiecliniju «102» pastupiła paviedamleńnie ab tym, što pa vulicy Prytyckaha zaminiravany načny kłub. Chutka pryjechała milicyja i sapiory, ale nijakaj «bomby» jany nie znajšli.
Vyśvietliłasia, što «zaminiravali» kłub dźvie dziaŭčyny, 19 i 21 hadoŭ. Ich zatrymali i dastavili ŭ Frunzienskaje RUUS stalicy. Na momant zatrymańnia dziaŭčyny znachodzilisia ŭ stanie ałkaholnaha apjanieńnia (u kryvi kožnaj ź ich było kala dvuch pramile ałkaholu). Svoj učynak jany patłumačyli tym, što ich nie puścili ŭ kłub (achoŭnikam ŭstanovy nie spadabaŭsia źniešni vyhlad dziaŭčat).
Darečy, abiedźvie zatrymanyja raniej nieadnarazova pryciahvalisia da administracyjnaj adkaznaści, u tym liku za raśpivańnie ałkaholnych napojaŭ u hramadskim miescy i ŭciahvańnie niepaŭnaletnich u antyhramadskija pavodziny. Bolš za toje, małodšaja ź dziaŭčyn znachodziłasia ŭ vyšuku jak asoba, jakaja znachodziccana prafiłaktyčnym uliku, jakaja źnikła ź miesca žycharstva.
Jak kvalifikavali ich dziejańni, pakul nieviadoma. Ale zhodna z artykułam 340 Kryminalnaha kodeksa Respubliki Biełaruś, zaviedama łžyvaje paviedamleńnie ab padrychtoŭcy vybuchu, padpale ci inšych dziejańniach, jakija stvarajuć niebiaśpieku dla žyćcia i zdaroŭja ludziej, albo pryčynieńnie škody ŭ bujnym pamiery, albo nastupleńnie inšych ciažkich nastupstvaŭ, karajecca štrafam, abo aryštam na termin da šaści miesiacaŭ,abo abmiežavańniem voli na termin da troch hadoŭ, abo pazbaŭleńniem voli na termin da piaci hadoŭ. Tyja ž dziejańni, učynienyja paŭtorna, abo hrupaj asob pa papiaredniaj zmovie, albo jakija paciahnuli pryčynieńnie škody ŭ bujnym pamiery, albo jakija paciahnuli inšyja ciažkija nastupstvy, karajucca abmiežavańniem voli na termin da piaci hadoŭ abo pazbaŭleńniem voli na termin ad troch da siami hadoŭ.
