Minski kłub Re:Public raspačaŭ zbor hrošaj na abnaŭleńnie. Ahulnaja suma, patrebnaja kłubu, nie nazyvajecca, ale ŭnioski prapanujecca rabić na sumy ad 100 tysiač da 10 miljonaŭ biełaruskich rubloŭ.
«Rok-kłub Re: Public, padparadkoŭvajučysia svajmu pryrodžanamu instynktu samazachavańnia, ciažka dychaje, sapie, ale hałavu nie apuściŭ i kročyć napierad, kab, bliskajučy zorkami, znoŭ sustrecca z taboj i ŭ čarhovy raz pahruzić ciabie ŭ atmaśfieru ščaścia, svabody i lubovi, — pišuć u zvarocie na sajcie. — Ty nie možaš biez muzyki, my nie možam bieź ciabie».
Kłubu patrebnyja hrošy na abnaŭleńnie aśviatleńnia i inšaj techničnaj častki, meblu, scenu, tancplacoŭku i bary. Za ŭniosak u 100 tysiač prapanujecca źnižka ŭ 10% na lubyja napoi ciaham miesiaca, za 200 tysiač — 20%, za 500 — 50%. Za ŭniosak u 10 młn dajecca kartka na biaspłatnaje naviedvańnie lubych kancertaŭ ciaham hoda na dźvie piersony i źnižka ŭ 10% na bar.
***
Re:Public jość papularnym miescam dla praviadzieńnia rok-kancertaŭ. Da kanca hoda tam majuć vystupić Machine Head, Enter Shakiri, Louna, Noize MC, Anathema, «Addis Abieba», Van Canto, OOMPH!, Lacrimosa, Akira Yamaoka, Poets of the Fall i inšyja zorki.
Z pačatku 2015 hoda ŭ Biełarusi zakryłasia dzieviać bujnych biełaruskich kłubaŭ, adznačaje TUT.BY. Praź finansavyja ciažkaści zakrylisia «Enierhija» ŭ Viciebsku, «Śfiera» ŭ Breście, «Alfa Centaŭra» ŭ Hrodnie, «Jeŭropa» ŭ Homieli. U Minsku začynilisia «Lalki» (što byŭ na miescy «Alkatrasa») i «Afryka». U Maładziečnie rajonny adździeł unutranych spraŭ začyniŭ kłuby «Stełs», «Mahnit» i «Kłab».
