Minski haradski sud 5 žniŭnia vynies pryhavor pa spravie ŭ dačynieńni da dvuch bratoŭ, hramadzian Kazachstana Vitala i Jaŭhiena Papovych, jakija ŭčynili zamach na ŭcioki z-pad varty i zamach na zabojstva supracoŭnika orhanaŭ unutranych spraŭ u suviazi z vykanańniem im abaviazkaŭ pa achovie hramadskaha paradku.
Sprava słuchałasia ŭ zakrytym sudovym pasiadžeńni.
Minharsud pryhavaryŭ Vitala Papova da 20 hadoŭ pazbaŭleńnia voli z kanfiskacyjaj majomaści, z adbyvańniem pakarańnia ŭ kałonii ŭzmocnienaha režymu, Jaŭhiena Papova — da 12 hadoŭ pazbaŭleńnia voli z kanfiskacyjaj majomaści, z adbyvańniem pakarańnia ŭ kałonii ŭzmocnienaha režymu.
Jak paviedamlaŭ BiełaPAN, 20 listapada minułaha hoda ŭ sudzie Savieckaha rajona Minska razhladałasia kryminalnaja sprava ab machlarstvie, učynienym hrupaj asob u asabliva bujnym pamiery. Paśla zakančeńnia sudovaha pasiadžeńnia dvoje bratoŭ 1979 i 1983 hadoŭ naradžeńnia, jakija prachodzili pa spravie u jakaści abvinavačvanych, akazali supraciŭleńnie supracoŭnikam milicyi i pasprabavali ŭciačy. Dziakujučy zładžanym dziejańniam kanvoju sproba ŭciokaŭ była praduchilena.
Sprabujučy ŭciačy, starejšy brat skarystaŭ frahmient mietaličnaj truby, znojdzienaj u adnym z pamiaškańniaŭ ahulnaha karystańnia. Im jon pryčyniŭ adnamu z kanvairaŭ ciažkija cialesnyja paškodžańni, ale supracoŭnik milicyi zdoleŭ abiazzbroić napadnika.
Dva inšyja kanvairy prymianili śpiecyjalnyja srodki i fizičnuju siłu dla spynieńnia dziejańniaŭ złamyśnika i jaho małodšaha brata, jaki sprabavaŭ akazać jamu sadziejničańnie. Pry hetym byli zrobleny papieradžalnyja vystrały z tabielnaj zbroi. Traŭmiravany supracoŭnik milicyi byŭ špitalizavany, jamu akazana kvalifikavanaja miedycynskaja dapamoha.
Jak vynikaje z pryhavoru, padčas incydentu supracoŭniki milicyi zrabili dva vystrały z tabielnaj zbroi, nichto nie paciarpieŭ.
Starejšy ź fihurantaŭ abvinavačvaŭsia ŭ sprobie ŭciokaŭ z-pad varty, učynienaj hrupaj asob z prymianieńniem nasilla (č. 1 art. 14 i č. 2 art. 413 KK), i zamachu na zabojstva supracoŭnika milicyi ŭ suviazi z vykanańniem im abaviazkaŭ pa achovie hramadskaha paradku (č. 1 art. 14 i art. 362 KK); małodšy — u sprobie ŭciokaŭ (č. 1 art. 14 i č. 2 art. 413 KK) i dapamahańni ŭ zamachu na zabojstva supracoŭnika milicyi (č. 6 art. 16, č. 1 art. 14 i art. 362 KK).
Padčas śledstva inicyjatar ŭciokaŭ matyvavaŭ svaje dziejańni niervovym zryvam u suviazi ź niezadavolenaściu chodam sudovaha pracesu i, u pryvatnaści, niežadańniem być asudžanym na doŭhi termin pazbaŭleńnia voli, ab jakim chadajničaŭ dziaržabvinavaŭca pierad sudom.
Sud vynies pastanovu ŭ adras načalnika śledčaha ŭpraŭleńnia USK pa Minsku ab parušeńni zakonnaści pry praviadzieńni papiaredniaha śledstva.
Pryhavor moža być abskardžany ŭ Viarchoŭnym sudzie praź Minski haradski sud. Ci budzie heta zroblena, advakaty asudžanych pakul nie viedajuć.
