U Minsku zatrymany małady čałaviek, jakoha padazrajuć va ŭčynieńni dziejańniaŭ seksualnaha charaktaru ŭ dačynieńni da dziaciej.
Jak paviedamlaje Ministerstva ŭnutranych spraŭ Biełarusi, u hałoŭnaje ŭpraŭleńnie pa narkakantroli i supraćdziejańni handlu ludźmi (HUNiSHŁ) MUS u krasaviku hetaha hoda sa staličnaj ustanovy adukacyi pastupiła infarmacyja pra niekalkich dziaciej ź dziŭnymi pavodzinami. Było vykazanaje mierkavańnie ab mahčymym učynieńni da ich złačynstvaŭ seksualnaha charaktaru.
Padčas pravierki było vyjaŭlena, što minčanin 1985 hoda naradžeńnia, jaki niejki čas žyŭ z maci ŭ ZŠA, traplaŭ u pole zroku amierykanskaj palicyi pa fakcie pošuku, prahladu i zachoŭvańnia dziciačaj parnahrafii. Adnak, paśla taho jak uciok ad pravaachoŭnych orhanaŭ ZŠA i paźbiehnuŭ kryminalnaj adkaznaści, jon viarnuŭsia ŭ Biełaruś.
Znachodziačysia ŭ Minsku, jon praciahvaŭ naviedvać sajty ź dziciačaj parnahrafijaj, a taksama mieŭ znosiny ź piedafiłami na roznych forumach. Apieratyŭnyja supracoŭniki vyjavili, što małady čałaviek z 2013 pa 2015 hady ŭ siabie ŭ kvatery nieadnarazova ŭčyniaŭ dziejańni seksualnaha charaktaru ŭ dačynieńni da zaviedama małaletniaj dziaŭčynki (2009 hoda naradžeńnia).
Padazrony zatrymany. U dačynieńni da jaho Savieckim (Minska) rajonnym adździełam Śledčaha kamiteta raspačataja kryminalnaja sprava.
«My majem źviestki, što hety vypadak nie adzinkavy, — paviedamiŭ načalnik adździeła HUNiSHŁ MUS Dźmitryj Cajun. — Tamu praciahvajem mierapryjemstvy pa vyjaŭleńni ŭsich faktaŭ učynieńnia zatrymanym pałavych złačynstvaŭ u dačynieńni da dziaciej, vyrabu i raspaŭsiudžvańnia parnahrafičnych materyjałaŭ ź niepaŭnaletnimi».
Pavodle źviestak milicejskaha viedamstva, za šeść miesiacaŭ 2015 hoda supracoŭnikami padraździaleńniaŭ pa supraćdziejańni handlu ludźmi MUS vyjaŭlenyja 127 złačynstvaŭ, źviazanych z seksualnaj ekspłuatacyjaj dziaciej, u tym liku 62 adnosiacca da katehoryi ciažkich i asabliva ciažkich. Sioleta vyjaŭlenyja 92 paciarpiełyja dziciaci, u tym liku 38 małaletnich, i 102 padazravanyja ŭ piedafilii.
Analiz złačynstvaŭ hetaj katehoryi śviedčyć, što ŭ bolšaści vypadkaŭ ich učynieńnie źviazanaje z vyrabam, zachoŭvańniem i raspaŭsiudžvańniem dziciačaj parnahrafii.
Ministerstva ŭnutranych spraŭ sumiesna z zacikaŭlenymi vystupaje ź inicyjatyvaj ab uviadzieńni kryminalnaj adkaznaści za hruminh (psichałahičnaja padrychtoŭka dziaciej u internecie da seksualnych adnosinaŭ), a taksama za vyrab, naŭmysnaje nabyćcio i zachoŭvańnie biez mety raspaŭsiudžvańnia dziciačaj parnahrafii. Na dumku śpiecyjalistaŭ, heta dazvolić papiaredzić učynieńnie ciažkich i asabliva ciažkich pałavych złačynstvaŭ u dačynieńni da dziaciej.
