Rejtynh kreatyŭnaści. Čym ciamniej, tym lepiej. Bieły — niama źviestak
Biełaruś zaniała 37 miesca sa 139 mahčymych ŭ rejtynhu Global Creativity Index-2015 (PDF), lidarami jakoha stali Aŭstralija, ZŠA i Novaja Ziełandyja. U pieršaj dziasiatcy taksama Kanada, Danija, Finlandyja, Šviecyja, Isłandyja, Sinhapur i Niderłandy.
Našaja kraina maje vysokija pazicyi pa pakaźnikach «Talent» (vośmyja ŭ śviecie!) i «Technałohija», troški horšyja pa «Talerantnaści».
Adnymi z samych talenavitych nas pryznali praz dolu darosłych z vyšejšaj adukacyjaj i dolu pracoŭnaj siły ŭ kreatyŭnym kłasie, chacia dakładnych źviestak pa druhim pakaźniku ŭkładalniki rejtynhu nie majuć (u našych susiedziaŭ da kreatyŭnaha kłasu pryličvajuć 30-40%). Pa doli ludziej z vyšejšaj adukacyjaj Biełaruś na 5 miescy ŭ śviecie. Pa paramietry «Talent» lidary — Aŭstralija Isłandyja, ZŠA i Finlandyja.
Pa technałohijach našyja pazicyi słabiejšyja, ale daloka nie najhoršyja ŭ śviecie: 41-ja ŭ śviecie, 39 miesca pa inviestycyjach u technałohii (R&D, «daśledavańni i raspracoŭka») i 25 miesca pa patentach na sotniu čałaviek. Lidar pa technałohijach — Paŭdniovaja Kareja, za joj Japonija, Izrail i ZŠA.
Z talerantnaściu horš: tolki 97-ja ŭ śviecie (my naohuł nie miralubivyja, jak pakazaŭ inšy rejtynh), 82-ja pa adkrytaści da etničnych mienšaściaŭ i 93-ja — da seksualnych. Tut my vielmi daloka ad lidaraŭ — Kanady, Isłandyi, Novaj Ziełandyi i Aŭstralii. Ale Rasija jašče dalej — jana na 123 miescy pa talerantnaści (z susiedziaŭ Biełarusi ŭ pieršaj sotni pa talerantnaści tolki Łatvija z 77 miescam).
Da kreatyŭnaha biełarusa ŭ kaściumie Žaleznaha čałavieka staviacca nietalerantna — nie puskajuć u mietro. Kadr z videa Paliny Dabravolskaj
Z susiedziaŭ Biełarusi najvyšejšuju pazicyju ŭ ahulnym rejtynhu maje Rasija — roŭna za nami, 38-je miesca. Łatvija maje 40-je miesca, Ukraina na 45-m miescy, roŭna za joj Polšča, Litva na 51-m.
Rejtynh Global Creativity Index štohod układajecca Marcinskim instytutam dabrabytu univiersiteta Taronta (Kanada). U rejtynhi minułych hadoŭ Biełaruś nie traplała.
