Barysaŭski BATE pravioŭ matč u adkaz treciaha kvalifikacyjnaha raŭnda futbolnaj Lihi čempijonaŭ. Na «Barysaŭ-Arenu» pryjechaŭ vuhorski «Videaton». Hulnia tydniovaj daŭniny pryniesła ničyju – 1:1. Abiedźvie kamandy zabivali svaje miačy paśla kutavych padač.
Zrešty, niahledziačy na ničyju, BATE ŭsio adno ličyŭsia biezumoŭnym favarytam supraćstajańnia. Bukmiekiery nie vieryli ŭ pośpiech haściej.
Vielmi bojka prajšoŭ handal kvitkami na matč. Jašče za niekalki dzion da sustrečy biletaŭ u prodažy ŭžo nie było. Ale da anšłahu ŭsio ž nie daciahnuli. Na trybunach prysutničała 12400 hledačoŭ. Najpierš treba adniać ceły siektar, jaki byŭ vydzieleny fanatam «Videaton» (ich było čałaviek dvaccać), a taksama, mahčyma, nie dajšli ŭsie ŭładalniki abaniemientaŭ.
U cełym padałosia, što «Videaton» — kamanda ŭzroŭniem słabiejšym za papiaredniaha supiernika BATE — irłandski «Dandałk». Praktyčna ŭsiu hulniu vienhry praviali ŭ abaronie. Navat i nie ŭzhadaješ ad ich momantaŭ, jakija pryniata nazyvać stopracentnymi.
BATE ž pravioŭ kali nie najlepšy matč u siezonie, to ŭ Lizie čempijonaŭ, dyk dakładna. Jašče ŭ pieršym tajmie Michaił Hardziajčuk i Alaksandr Karnicki pavinny byli zdymać usie pytańni ab pieramožcy pary, ale zaciahnuli da apošniaha – až da 81-aj chviliny.
Vielmi admietna, što hoł BATE zabiŭ z halavoj pieradačy Maksima Žaŭnierčyka. Mienavita pravy abaronca «žoŭta-sinich» byŭ najlepšym hulcom matča. Jon svoječasova i nadziejna hulaŭ u abaronie, a jašče paśpiavaŭ u ataku (adnojčy trapiŭ u štanhu). Dyk voś Žaŭnierčyk naviesiŭ, a čarnahorac Niemańja Nikalič zabiŭ svoj pieršy hoł za BATE — 1:0.
Nikalič zabivaje hoł.
Dziela spraviadlivaści varta adznačyć, što na toj čas «Videaton» hulaŭ u mienšaści. U pačatku druhoha tajma čyrvonuju kartku atrymaŭ abaronca haściej Lejks. Paśla heta ŭ atacy BATE stała bolš prastory, a adpaviedna i bolš halavych momantaŭ.
Nasamreč, lik 1:0 zusim nie adlustroŭvaje ŭzrovień kamand. BATE pieramoh pa spravie.
Dziakujučy hetamu pośpiechu BATE čarhovy raz zabiaśpiečyŭ sabie jeŭrakubkavuju vosień. Navat u vypadku niaŭdačy ŭ płej-of Lihi čempijonaŭ kamanda trapić u hrupavy etap Lihi Jeŭropy.
Nastupny supiernik barysaŭcaŭ stanie viadomy ŭ piatnicu.