Pieradvybarnyja teledebaty kandydataŭ u prezidenty projduć 3 kastryčnika, paviedamiła staršynia Centrvybarkama Lidzija Jarmošyna 6 žniŭnia na pasiadžeńni CVK.
Siońnia Centralnaja kamisija pryniała pastanovu ab vykarystańni srodkaŭ masavaj infarmacyi padčas kampanii pa vybarach prezidenta.
Teledebaty pačnucca 3 kastryčnika ŭ 17.00. Kali kandydataŭ budzie bolš za piać, to na debaty budzie vydzielena paŭtary hadziny, kali mienš — hadzina. Paradak praviadzieńnia debataŭ budzie vyznačać Biełteleradyjokampanija.
Kandydat u prezidenty taksama zmoža biaspłatna vystupić pa telebačańni i radyjo. Vystupleńni pa telebačańni buduć prachodzić z 14 pa 25 vieraśnia z 19.00 da 20.00 na kanale «Biełaruś 1», kandydaty zmohuć vystupić dvojčy. Pa radyjo vystupleńni kandydataŭ buduć arhanizavanyja z 21 vieraśnia pa 2 kastryčnika z 6.10 da 7.10.
Dla vystupleńnia na telebačańni i radyjo kandydat u prezidenty pavinien pryjści sam, na debaty jon moža prysłać davieranuju asobu.
Jak zaznačyła Jarmošyna, pry padrychtoŭcy dakumienta ab vykarystańni ŚMI rabotniki CVK kiravalisia tym, kab umovy dla kandydataŭ byli nie horšyja, čym u 2010 hodzie. U suviazi z hetym, dadała jana, byli zachavanyja mnohija libieralnyja papraŭki, pryniatyja piać hadoŭ tamu. U pryvatnaści, kandydatam budzie dadzienaja mahčymaść vystupić u pramym efiry, ale pry žadańni jany zmohuć paprasić dać mahčymaść zrabić zapis vystupleńnia zahadzia.
Kandydaty taksama majuć prava na biaspłatnaje apublikavańnie pieradvybarnaj prahramy ŭ haziecie.
Aprača taho, kandydaty mohuć za svaje srodki nabyvać miesca ŭ ŚMI dla publikavańnia prahramy abo vystupleńnia ŭ efiry.
