Fota: google.com/datacenters
Mabilny apieratar velcom raspavioŭ ab płanach pa zapusku ŭ kastryčniku 2016 hoda najvialikšaha ŭ Biełarusi centru apracoŭki źviestak.
Čytajcie taksama: velcom nazvaŭ hałoŭnyja prablemy biełaruskich mabilnych apierataraŭ
Papiarednija zamovy na pasłuhi data-centru prymajucca ź siońniašniaha dnia.
velcom zasvojvaje novy dla siabie biźnies — jon prapanuje inšym kampanijam zachoŭvać i apracoŭvać źviestki na ŭłasnych siervierach u data-centry velcom. Takaja pasłuha ŭ Biełarusi pakul słaba raspaŭsiudžanaja.
Data-centr budzie zbudavany ŭ Kałodziščach (pobač z data-centram beCloud), asnoŭnym padradčykam pa techničnaj častcy stanie kitajski Huawei.
Jak i inšyja apieratary, velcom maje data-centry dla ŭłasnych patreb (ich u apieratara na siońnia try). Ale ciapier płanuje zbudavać data-centr, aryjentavany na prodaž pasłuh inšym kampanijam, jak to płanuje rabić (i chutčej za ŭsio zrobić raniej za velcom) dziaržaŭny beCloud.
Apieratar ličyć biełaruski rynak centraŭ apracoŭki źviestak adnosna volnym (tut Biełaruś adstaje ad suśvietnych trendaŭ), a kankurencyi z boku BeCloud nie baicca. velcom ličyć, što dziaržaŭnaja kampanija budzie bolš skancentravanaja na pradstaŭleńnie pasłuh dziaržaŭnym strukturam.
Sama ža celicca jak na biełaruskija kampanii (ad bankaŭ, retejleraŭ i IT-kampanij da nievialikich pravajdaraŭ), tak i na zamiežnych klijentaŭ. Da taho ž, velcom płanuje prapanavać vysoki standart ustojlivaści złučeńnia, paćvierdžany mižnarodnym siertyfikatam.
Adna z asnoŭnych prablem u stvareńni data-centraŭ u Biełarusi — vysokija ceny na elektryčnaść, najvyšejšyja ŭ Jeŭropie dla pramysłovaści. Tut velcom spadziajecca na rebałansiroŭku cen u bližejšy čas (u tym liku situacyju z cenami moža źmianić biełaruskaja AES — ale nie fakt, što źmienić istotna), ale i sam razhladaje mahčymaść vypracoŭki enierhii dla data-centraŭ.
Praz vysokija ceny na elektryčnaść velcom razhladaje mahčymaść samastojnaj vypracoŭki elektryčnaści — i dumaje, što ŭ budučyni hetaja elektryčnaść moža stać i «zialonaj».
Chacia pieršasnaja zadača velcom — zbudavać prosta jakasny data-centr bieź niezvyčajnych «navarotaŭ», kampanija razhladaje i varyjanty z vypracoŭkaj u budučyni «čystaj» elektryčnaści dla patreb data-centru. Naprykład, praz soniečnyja batarei — u śviecie isnujuć navat całkam «zialonyja» data-centry (ich vykarystoŭvajuć Google, Microsoft i navat skandalnaje ANB), elektryčnaść na jakija biarecca z alternatyŭnych krynic.
Finansavy dyrektar velcom Dzianis Fiłazafovič raspaviadaje pra «zialonyja» data-centry, dy zhadvaje, što za jaho śpinaj na niebakrai bačnaja hara — haradskaja zvałka. Fota: pres-słužba velcom
Dy pakul Biełaruś, mahčyma, jak kraina jašče nie saśpieła dla surjoznaha kłopatu ab navakolnym asiarodździ ŭ takich pytańniach.
