Stvoranaja uładalnikami «Jeŭraopta» ŭ Litvie sietka kram Fresh market spyniaje svaju pracu. Dadzienuju infarmacyju TUT.BY paćvierdzili niekalki nie źviazanych adna z adnoj krynic.
Tut i nižej fota: DELFI
Kramy handlovaj sietki Fresh market, što pracuje apošnija dni, čakajuć pakupnikoŭ, jakija chočuć atrymać tavary tańniej, piša DELFI. Siońnia tut dajucca źnižki 15-20% na mnohija hrupy tavaraŭ. Pry hetym pakupnikoŭ čakajuć paŭpustyja palicy. Na hetym tydni častka pastaŭščykoŭ sietki, jakaja dziejničała kala dvuch hadoŭ, atrymała listy z zaprašeńniem pryjechać zabrać tavary.
Pavodle dadzienych krynic DELFI, kramy začyniajucca ŭ dva etapy. Apošni dzień pracy adnych kram — 6 žniŭnia, inšych — 9 žniŭnia.
U kancy lipienia było paviedamleńnie ab tym, što Fresh market spyniaje handal praź internet.
Sietka Fresh market, hałoŭnymi inviestarami ŭ jakoj nazyvajucca stvaralniki biełaruskaha rytejlera «Jeŭraopt» Siarhiej Litvin i Uładzimir Vasilko, biare svoj pačatak z 2013 hoda. Supiermarkiety płoščaj 400-1000 kv. m adkryvalisia ŭ spalnych rajonach bujnych litoŭskich haradoŭ. Sietka pazicyjanavałasia jak apieratar mahazinaŭ farmatu «la doma», dzie zaŭsiody možna nabyć śviežyja pradukty.
Atrymać infarmacyju ab tym, kolki kankretna ciapier funkcyjanuje handlovych abjektaŭ Fresh market, nie ŭdałosia. Prahučali roznyja ličby. Na kaniec 2014 hoda ŭ Litvie było adkryta 26 kram pad brendam Fresh market, vynikaje z prezientacyi dla inviestaraŭ kampanii Litvina i Vasilko.
Kiraŭnik Fresh market Saŭlus Urbonas admoviŭsia ad kamientaroŭ partału TUT.BY. Razam z tym litoŭskaj dziełavoj haziecie Verslo zinios jon paćvierdziŭ, što «kramy buduć začynienyja». «Ale my trymajemsia stratehii ničoha nie kamientavać», — skazaŭ jon.
«Dumaju, sietka prosta nie vytrymała kankurencyi», — skazaŭ TUT.BY ekśpiert litoŭskaha roźničnaha rynku. Litoŭski praduktovy rytejł źjaŭlajecca vysoka kancentravanym. Bolš za 70% rynku zajmajuć piać bujnych handlovych apierataraŭ (Rimi, Maxima, Iki, Norfa, Prisma). «Tamu astatnim hulcam składana kankuryravać na hetym rynku», — reziumavaŭ surazmoŭca.
Plus da ŭsiaho niamieckaja sietka Lidl rychtuje da adkryćcia ŭ Litvie kala 25 kram. «Šmat kramaŭ ŭžo pabudavana. Jany ciapier nabirajuć piersanał. Dumaju, što adkryjucca ŭ hetym hodzie ci ŭ pačatku nastupnaha. Adnak udzielniki rynku ŭžo ciapier rychtujucca da hetaha. Naprykład, Maxima źniziła ceny na vielmi mnohija tavary», — skazaŭ surazmoŭca.
Pry hetym krynicy nie vyklučajuć, što składanaja situacyja na biełaruskim rynku, pretenzii Minhandlu spačatku da «Jeŭraopta», a potym i da afiliravanaha «Dabranoma», «viadoma, nie mahli nie adbicca na płanach pa raźvićci ŭ Litvie». Krynica, znajomaja ź Litvinym i Vasilko, zajaviła, što situacyja ŭ Litvie nijak nie źviazanaja ź dziejnaściu ŭ Biełarusi. «Heta absalutna roznyja prajekty», — adznačyŭ jon. «My nijak nie źviazanyja i nie majem dačynieńnia da Fresh market», — pieradaŭ praz pradstaŭnika staršynia savieta dyrektaraŭ «Jeŭrahandal» (kiruje sietkaj «Jeŭraopt») Andrej Zubkoŭ.
U sieradu, 5 žniŭnia, Dziaržaŭnaja inśpiekcyja pracy Litvy pačała pravierku situacyi va Fresh market. Da hetaha jaje padšturchnuli rabotniki sietki, jakija paskardzilisia, što «ich pad ciskam vymušajuć syści dobraachvotna, pry hetym nie vypłaciŭšy vychadnych dapamoh».
