U rasparadžeńnie ministerstva zamiežnych spraŭ Litvy trapiŭ pašpart rasijskaha hramadzianina, vydadzieny ŭ 2013 hodzie, u jakim Krym paznačany jak častka Rasijskaj Fiederacyi.
«Jeŭrapiejskaja praŭda» atrymała ad litoŭskaha dypviedamstva skankopiju dakumienta z prychavanymi piersanalnymi dadzienymi i kamientary dypłamataŭ.
Pradjaŭnik dakumienta, rasiejec 1992 naradžeńnia, pražyvaje ŭ Kalininhradskaj vobłaści i źviarnuŭsia ŭ konsulstva Litvy ŭ Kalininhradzie pa dazvoł na prajezd pa terytoryi ES (vydajecca kalininhradcam-rasiejcam, jakija chočuć prajechać na asnoŭnuju terytoryju RF naziemnym transpartam).
Hety zamiežny pašpart byŭ vydadzieny taksama ŭ Kalininhradskaj vobłaści i datavany 24 śniežnia 2013 hoda. U hety čas, jak viadoma, u Kijevie prachodziŭ Jeŭramajdan, a RF jašče nie ažyćciaviła niezakonnuju anieksiju Kryma.
Miž tym miescam naradžeńnia pradjaŭnika pašparta paznačanaja «Respublika Krym, Rasija».
«Hety pašpart źjaŭlajecca aburalnaj demanstracyjaj aficyjnaj pazicyi Rasii adnosna terytaryjalnaj cełasnaści i suvierenitetu Ukrainy navat da niezakonnaj anieksii Krymskaha paŭvostrava.
Jaho vydali tolki praz tydzień paśla sustrečy Janukoviča i Pucina ŭ Maskvie, kali apošni paabiacaŭ Ukrainie padtrymku i kredyt u pamiery $15 młrd», — padkreślili ŭ litoŭskim viedamstvie.
Rasiejcu-pradjaŭniku pašparta było admoŭlena ŭ dazvole na ŭjezd u ES, adznačajuć u MZS Litvy.
