Kiraŭnik ministerstva sielskaj haspadarki Rasii Alaksandr Tkačoŭ ličyć, što sankcyjnyja pradukty mohuć pradstaŭlać pahrozu dla zdaroŭja rasiejcaŭ, tamu ich nieabchodna źniščać.
Foto: «Kommiersant'»
Pa słovach Tkačova, sankcyjnaja pradukcyja, jak praviła, sumnieŭnaj jakaści. «My nie možam dazvolić, kab jana pastaŭlałasia ŭ kramy, my nie možam ryzykavać zdaroŭjem našych hramadzian», — zajaviŭ Tkačoŭ.
Pry hetym, tłumačačy, čamu pradukty nielha razdać małamajomasnym rasiejcam, Tkačoŭ nie zhadaŭ pra niebiaśpieku hetych praduktaŭ dla zdaroŭja biednych. Sa słoŭ Tkačova, pradukty nie mohuć być raźmierkavanyja siarod małamajomnych z-za niebiaśpieki karupcyi.
«Kali hetyja pradukty buduć raźmiarkoŭvacca, to dzie harantyja, što nie budzie karupcyi, pieravyšeńnia paŭnamoctvaŭ?» — kaža ministr.
Jak padkreśliŭ ministr, źniščeńnie sankcyjnych praduktaŭ adpaviadaje suśvietnaj praktycy. «Jość suśvietnaja praktyka — kali ty parušyŭ zakon, kali heta kantrabanda, heta pavinna padlahać źniščeńniu», — zajaviŭ jon.
Miž tym, bolš za 280 tysiač rasiejcaŭ ŭžo vykazali pratest u suviazi sa źniščeńniem śviežych praduktaŭ i vystupili za pieradaču ich hramadzianam, jakija žyvuć u niastačy, padpisaŭšy pietycyju. Jak skazaŭ pres-sakratar prezidenta RF Dźmitryj Piaskoŭ, u Kramli jaje «prymuć da ŭvahi».
Pa słovach Piaskova, mierkavańni, pavodle jakich źniščajucca pradukty, takija: spynić kantrabandu, realizavać sankcyi suprać šerahu krain (jakija ŭviali sankcyi suprać RF), abaranić ekanamičnyja intaresy Rasii, a hałoŭnaje — zabiaśpiečyć kłopat pra zdaroŭje hramadzian.
Piaskoŭ skazaŭ, što pietycyja pakul nie pravieranaja. Ułady vykazvali sumnievy ŭ aŭtentyčnaści podpisaŭ. Inicyjatary zvarotu zajavili pra hatoŭnaść dakazać, što jany — realnyja ludzi.
