Patencyjny kandydat u prezidenty Viktar Ciareščanka i jaho štab vykarystali novy pryjom – zaraz podpisy za jaho źbirajuć u vyšymajkach.

Na pikiecie kala ŭniviermaha «Biełaruś» hojsajuć maładyja ludzi ŭ biełych sakołkach z nacyjanalnym arnamientam. U rukach jany trymajuć tečki z partretam kandydata ŭ prezidenty Viktara Ciareščanki. Sam kandydat taksama tut – hutaryć z narodam.

Kiraŭnik inicyjatyŭnaj hrupy Ciareščanki, Aleh Piatrovič Nieściarkoŭ, zapeŭnivaje, što vyšymajki – heta ich ułasnaja inicyjatyva, a nie sproba pryciahnuć uvahu.

Sam kiraŭnik hrupy zajmajecca biznesam. Jon namieśnik dyrektara TAA «Brandtrejd», jakoje zajmajecca handlem vohnieŭstojlivych składaŭ dla budmateryjałaŭ. Na čas pieradvybarnaj kampanii ŭziaŭ trochmiesiačny adpačynak. Ściaviardžaje, što načalstva pastaviłasia da hetaha z parazumieńniem.

Aleh Nieściarkoŭ i Viktar Ciareščanka

Aleh Nieściarkoŭ i Viktar Ciareščanka

Pa słovach Ciareščanki i jaho paplečnika, pa stanie na 11 žniŭnia jany ŭžo sabrali bolš za 120 tysiač podpisaŭ. Pa Minsku ŭ ich bolš za 10 pikietaŭ, jašče 30 – pa ŭsioj krainie. Nieściarkoŭ navat pakazaŭ «statystyku»: pavodle jaho zapisaŭ, pa stanie na 8 žniŭnia bolš za ŭsio sabrali ŭ stalicy (25 800). U Viciebskaj vobłaści — 15 700, Mahiloŭskaj — 18 600, Hrodzienskaj — 8600, Bresckaj — 9 900, Homielskaj — 14 200. Bolš plonu nibyta daje abychod kvater.

«My pryciahvajem šmat vałancioraŭ. Heta maładyja ludzi z aktyŭnaj pazicyjaj», — tłumačyć Aleh Piatrovič.

Idu da maładych ludziej z aktyŭnaj pazicyjaj. Alaksiej i Illa razmaŭlajuć pa-rusku. Vučacca ŭ handlovym kaledžy na druhim kursie. Minčuki.

Alaksiej i Illa. Fatahravacca «maładyja ludzi z aktyŭnaj pazicyjaj» nie vielmi chacieli.

Alaksiej i Illa. Fatahravacca «maładyja ludzi z aktyŭnaj pazicyjaj» nie vielmi chacieli.

«NN»: Što vas padšturchnuła pajści ŭ vałanciory?

— Zaraz… Treba padumać… Vyrašyli dapamahčy prajści… Viktaru Ciareščanku…

«NN»: A čamu mienavita jamu?

— Spadabałasia jaho kandydatura…

«NN»: A čym spadabałasia?

— Jon ekanomik.

«NN»: «Ekanomik»?

— Da…

«NN»: I što heta daje? Čym jon budzie lepšy za Łukašenku?

— Jany mnie ŭsie padabajucca… U našaj krainie hałasuje narod. Voś ja vyrašyŭ dapamahčy Viktaru Ciareščanku.

Ničoha nie zrazumieła, ale boh ź im. Dalej Alaksiej raskazvaje, što pajšoŭ da Ciareščanki, bo ŭ jaho inicyjatyŭnuju hrupu byŭ nabor – prychodzili ŭ kaledž, zaprašali. Śćviardžaje, što staić na śpiocy biaspłatna.

Inšaja vałanciorka, Hanna — pieršakurśnica BDEU. Na pytańnie, za kaho budzie hałasavać, upeŭniena skazała, što za Ciareščanku («bo za jaho baćki hałasujuć»). Praŭda, raskazać, što jana pra jaho viedaje i čym jon adroźnivajecca ad inšych kandydataŭ, dziaŭčyna tak i nie zmahła. «Ja nie viedaju», — skazała jana paśla doŭhaj paŭzy.

Praŭda, i sam kandydat absalutna varty svaich zborščykaŭ. Uvohule, skłałasia ŭražańnie, što kiruje pracesam mienavita ruplivy Aleh Nieściarkoŭ. Bo sam Ciareščanka navat na pytańni adkazvaŭ z prablemami.

«NN»: Vy ekanamist? A dzie pracujecie?

— Staršynia rady dyrektaraŭ.

«NN»: Jakoj?

— Tak, dzie tut napisana… (razhladaje ŭłasny stend).

«NN»: TAA «HrandKalenduła»?

— Tak! Heta inviestycyjnyja technałohii. Nou-chau.

«NN»: Dyk a čym zajmajeciesia?

— Ja ekanamist. Zajmajusia valutnymi, ekspartnymi pracesami. «HrandKalenduła» — heta pryciahnieńnie inviestycyj, prodaž biełaruskich tavaraŭ za miažu: MAZy, BiełAZy.

Zatym Ciareščanka pierabłytaŭ imia i proźvišča dyrektara svajho TAA (praŭda, paźniej uspomniŭ).

Potym, kali źjaviłasia karespandentka BiełaPAN i prapanavała jamu pieraapranucca ŭ vyšymajku, Ciareščanka z adčuvańniem nakanavanaści ŭzdychnuŭ: «Treba?»

Piatrovič kiŭnuŭ, i kandydata adviali pieraapranacca. Zatym, kali ŭžo źjazdžali na inšy pikiet, Ciareščanka spačatku niekalki razoŭ z nadziejaj u hołasie cikaviŭsia ŭ Nieściarkova: nu my ž niadoŭha? A potym čamuści spytaŭ u mianie: «Mnie pieraapranucca ci ŭ hetym [ŭ vyšymajcy — «NN»] možna?»

Ja pacisnuŭ plačyma. Nu što tut skažaš?

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?