Inicyjatyŭnaja hrupa žycharoŭ 10 žniŭnia pieradała ŭ administracyju Leninskaha rajona Minska kalektyŭny zvarot z zaŭvahami i prapanovami nakont vyniesienaha na hramadskaje abmierkavańnie prajekta revitalizacyi terytoryi byłoha kapišča z rekanstrukcyjaj restarana «Staroje rusło». Ab hetym paviedamiŭ BiełaPAN člen arhkamiteta pa stvareńni hramadzianskaj inicyjatyvy «Jeŭrapierśpiektyva» Viktar Jančurevič

Jak paviedamlałasia raniej, minčanie vystupajuć suprać zabudovy terytoryi byłoha kapišča kala parku 40-hodździa Kastryčnika. U składzie kompleksu praduhledžany tematyčny restaran, bułačnaja-kandytarskaja premium-kłasa, kafe roznych kirunkaŭ, u tym liku dziciačaje kafe, dehustacyjnaja zała, bankietna-vystavačnyja zały i administracyjny korpus. U Minharvykankamie ličać, što takaja architekturnaja kancepcyja abjekta adpaviadaje mecie i skiravana na realizacyju ŭkaza prezidenta № 332 ad 30.06.2014, pryniataha ŭ metach zabieśpiačeńnia revitalizacyi (adnaŭleńnia, ažyŭleńnia, uznaŭleńnia) terytoryi byłoha kapišča (Ch—XX stst.) z rekanstrukcyjaj restarana «Staroje rusło» ŭ restaranny kompleks u miežach kvartała vulica Uljanaŭskaja — vulica Lenina — raka Śvisłač. 

Hramadskaje abmierkavańnie prajekta pravodziłasia z 27 lipienia pa 10 žniŭnia. «Na žal, abmierkavańnie pravodzicca ŭ formie, jakaja vyklučaje ŭdzieł pradstaŭnikoŭ hramadskaści ŭ pracy kamisii. Rašeńnie budzie prymać architekturny saviet pry kamitecie architektury Minharvykankama», — adznačyŭ Jančurevič. 

Pad zvarotam, jaki ŭčora pieradali ŭ administracyju, paśpieła padpisacca 166 čałaviek. Padtrymać kalehaŭ pryjšli pradstaŭniki inicyjatyŭnych hrup z vulic Viljamsa i Kirava. 

«Žychary horada vykazali pryncypovuju niazhodu z prapanavanym varyjantam revitalizacyi, heta značyć viartańnia da žyćcia, terytoryi kapišča jak historyka-kulturnaj kaštoŭnaści, pryznanaj Ministerstvam kultury, abjekta materyjalnaj i duchoŭnaj spadčyny, bo prajekt nie adpaviadaje histaryčnamu duchu i statusu terytoryi.

Płanujecca budaŭnictva maštabnaha administracyjnaha i restarannaha kompleksaŭ, a dla kapišča praduhledžana ŭsiaho tolki infarmacyjnaja tablička», — rastłumačyŭ Jančurevič. 

Jak adznačaje kaardynatar inicyjatyŭnaj hrupy Ludmiła Hajkoŭskaja, «ź niehatyŭnym staŭleńniem da prajekta vystupiła ekśpiertnaja supolnaść». Svaje zaŭvahi arhanizataru hramadskaha abmierkavańnia nakiravali łaŭreat dziaržaŭnaj premii ŭ halinie architektury Barys Jurcin, fiłołah Rehina Hamzovič, staršynia respublikanskaha maładziožnaha abjadnańnia «Studenckaja etnahrafičnaja supolnaść» Alaksiej Hłuško, architektar Andrej Šułajeŭ, archieołah, kandydat histaryčnych navuk Ludmiła Dučyc i inšyja. «Spadziajemsia, što mierkavańnie žycharoŭ horada i ekśpiertaŭ budzie pačuta i prajekt budzie adpraŭleny na dapracoŭku», — adznačyła aktyvistka.

Клас
Панылы сорам
Ха-ха
Ого
Сумна
Абуральна