Palityčny ahladalnik Raman Jakaŭleŭski padzialiŭsia svaimi prahnozami adnosna 5-dzionnaha vizitu ministra zamiežnych spravaŭ Biełarusi Uładzimira Makieja va Ukrainu.
«Padajecca, što hety vizit u peŭnaj stupieni raptoŭny, nie anansavany raniej. Ja b źviarnuŭ uvahu, što pierad Makiejem u Kijevie pabyvaŭ ministr abarony Vialikabrytanii. Pa peŭnych źviestkach, mohuć być zruchi ŭ tak zvanym «Minskim pracesie», nakont Ukrainy. Hetyja zruchi nabyvajuć jašče bolš militarysckija farby. I ŭ hetych pracesach miesca dla Biełarusi niama.
Ja nie vyklučaju, što jon pavioz prapanovy i pohlady Łukašenki na hetyja źjavy. Taksama b nie vyklučaŭ, što hetyja inicyjatyvy mahli b sychodzić z boku Maskvy. A biełarusy vykonvajuć rolu suviaznoha.
Nieviadomaja prahrama vizitu. Niechta kaža, ci to žartam, ci nie, što Makiej moža sustrecca z hubiernataram Adeskaj vobłaści Michaiłam Saakašvili, choć uzrovień ministra i hubiernatara rozny. Niekali Łukašenka nie chavaŭ, što mienavita Saakašvili ŭ ciažkija časy dla biełaruskaha režymu adyhryvaŭ rolu łabista Biełarusi na mižnarodnaj arenie.
Adesa dla Makieja nie čužy horad. Nahadaju, što ŭ svoj čas jon pracavaŭ pierakładčykam u Adeskim porcie. Jość takaja staronka ŭ jaho bijahrafii.
Biezumoŭna, kali heta nie adpačynak, a rabočy vizit, to ja b paraiŭ pahladzieć, chto budzie supravadžać Makieja ŭ hetaj pajezdcy. Kali razam ź im buduć ludzi z Vajskova-pramysłovaha kamiteta, to značyć vizit moža być źviazany z pytańniami abaronnaj śfiery. U Makieja ž prosta taki mandat.
Kaapieracyja z Ukrainaj u vajskovaj śfiery mahła być vyhadnaj Biełarusi. Našy ŭłady nie chavajuć, što chacieli b pieraniać niejkija punkty supracoŭnictva ŭ abaronnaj halinie, što zastalisia paśla spynieńnia supracoŭnictva Ukrainy i Rasii».
