Fota: duiops.net
Navukoŭcy ź Vialikabrytanii pravieryli na ludziach teoryju ab tym, što pałasataja afarboŭka zaminaje drapiežnikam palavać na achviaru, ab vynikach jany raspaviali ŭ časopisie Frontiers in Zoology.
Pałosy nie zaminajuć i navat dapamahajuć drapiežnikam hnacca za achviaraj i nie stvarajuć aptyčnych iluzij. Mahčyma, ziebry pałasatyja prosta tamu, što tak prachałodniej.
Šaści dziasiatkam ludziej navukoŭcy prapanavali hulniu, u jakoj treba było trapić palcam u celi na sensarnym ekranie. Spačatku celi paśladoŭna byli šerymi i pałasatymi, pałosy mahli iści ŭ lubym napramku. Zatym prapanavali niekalki celej adnačasova. U abodvuch vypadkach pałasatyja celi łavilisia lepiej za šeryja, pry hetym u druhim vypadku napramak pałos nijak nie paŭpłyvaŭ na paśpiachovaść «palavańnia».
Raniej mierkavałasia, što pałasataja afarboŭka ziebraŭ maje zaminać drapiežniku aceńvać dystancyju da achviary, za hetu teoryju vykazvalisia ŭ 2013 hodzie aŭstralijskija navukoŭcy, jakija praviali kampjutarnaje madelavańnie ruchu pałasatych abjektaŭ. Siarod inšych niepaćvierdžanych teoryj — sacyjalnaja rola afarboŭki i adpužvańnie nasiakomych, jakija bolš lubiać adnatonnyja pavierchni.
Samaj realistyčnaj teoryjaj na siońnia možna nazvać takuju teoryju daśledčykaŭ z Kalifarnijskaha univiersiteta (ZŠA). Ziebry mienš efiektyŭna za inšych kapytnych pierastraŭlivajuć ježu, tamu musiać bolš času pravodzić za jadoj na soncy, a praz heta majuć patrebu ŭ dadatkovaj termarehulacyi. Biełyja pałoski nahrajucca mieniej, čornyja — bolej, a heta stvaraje mikracyrkulacyju pavietranych patokaŭ pobač sa skuraj, što dazvalaje ziebram efiektyŭna achałodžvacca.
