U Hrodnie adkryŭsia Muziej turemnaha pobytu, pieradaje BiełTA. Jon raźmiaściŭsia ŭ samym centry horada na rahu vulic Kirava i Uryckaha ŭ niepasrednaj blizkaści ad haradzienskaj turmy №1.
U adnapaviarchovym histaryčnym budynku, jaki naležyć turmie, niekali byli žyłyja pakoi i kabiniet načalnika turmy.
Muziej u dzień adkryćcia aśviacili śviatary abiedźviuch kanfiesij.
Ekspazicyja muzieja raspaviadaje pra historyju turmy i pakarańnia z časoŭ VKŁ i da našaha času. Asobnyja častki pryśviečany supracoŭnikam i kiraŭnikam papraŭčaj ustanovy, inšyja — asablivaściam pobytu aryštantaŭ, ciažaru turemnaha žyćcia, viadomym asobam, jakija ŭ rozny čas adbyvali pakarańnie ŭ Hrodnie.
Siarod ich Napaleon Orda, Branisłaŭ Taraškievič, Paŭlina Miadziołka, Fieliks Dziaržynski, Tamaš Hryb, Źmicier Daškievič, Mikałaj Aŭtuchovič… Apošnich, praŭda, pakul nie zhadvajuć.
Hrodzienskaja turma — najstarejšaja vypraŭlenčaja ŭstanova na terytoryi Biełarusi. Jana raźmiaščajecca na terytoryi jezuickaha kalehiuma, jaki ŭjaŭlaje saboj architekturny kompleks: manastyr, kalehium, apteku, bursu, biblijateku i haspadarčyja pamiaškańni. U časy VKŁ hrodzienskich aryštantaŭ ŭtrymlivali ŭ viaźnicy Staroha zamka, paźniej — u turmie ŭ budynku haradskoj ratušy. Paśla vajny 1812 hoda ŭ Hrodnie na terytoryi kalehiuma było raspačata budaŭnictva turemnaha zamka, a pieršych źniavolenych pieraviali siudy ŭ 1820 hodzie. Užo ŭ hety čas tut raźmiaščalisia kamiery dla prostaha ludu i try sakretnyja kamiery dla asabliva niebiaśpiečnych złačyncaŭ. Paźniej budynak turmy źviedaŭ niekalki pierabudoŭ. Padčas Vialikaj Ajčynnaj vajny niekalki bombaŭ ŭpali na turmu, razburyŭšy adzin z najstarejšych karpusoŭ.
Niekalki hadoŭ tamu haradzienskija ŭłady ŭzdymali pytańnie ab nieabchodnaści vynasu turmy z horada. Adnak, jak paviedamiŭ načalnik turmy Uładzimir Šablinski, pytańnie pra zakryćcio turmy i pieranosie jaje z horada na siońnia całkam zakryta. Turmu pieranosić z Hrodna nie buduć.
Simvaličnuju stužku pierarezali namieśnik ministra ŭnutranych spraŭ Viktar Dubaviec, načalnik Departamienta vykanańnia pakarańniaŭ MUS Siarhiej Daroška i namieśnik staršyni Hrodzienskaha abłvykankama Juryj Šulejka.