Teścirujem dastaŭku dranikaŭ eDraniki

Siońnia usio bolš papularnaj robicca dastaŭka ježy. U internecie źjaviłasia dastaŭka dranikaŭ i inšaj biełaruskaj kuchni — edraniki.by.

Sajt zrobleny davoli erhanamična i na biełaruskaj movie. Možna zamović ježu jak na sajcie, tak i pa telefonie.

U mieniu jość jak draniki, tak i inšyja prysmaki. Tut jość i draniki sa śvininaj, viehietaryjanskija z harodninaj i syram fieta, hrudzinkaj i hrybami. U astatnim heta sałaty, bulba roznaha smažańnia i napoi. Pryčym akramia suśvietnych Soca-Cola, Fanta, jość i biarozavik. Nu što ž, prateścirujem.

Słužba dastaŭki pracuje z 11:00 pa 22:30 štodzionna. Dla taho kab vam pieratelefanavali, na sajcie treba pakinuć imia i kantaktny mabilny numar. Treba padkreślić, što pry hetym nie abaviazkova rehistravacca na sajcie. Paśla taho, jak pakinuli numar, na sajcie napišuć, što zapyt zarehistravany i čakać telefanavańnia treba na praciahu 15 chvilin.

Pieratelefanavali ŭžo praz chvilinu. Dziaŭčyna razmaŭlała pa-rusku, ale całkam razumieła, što ad jaje chočuć pa-biełarusku. My zamovili:

Draniki z hrudzinkaj dy hrybami (93 000 b.r.)
Bulba pa-viaskovamu (22 000 b.r.)
Sous Heinz syrny (7 000 b.r.)
Sałata z aharodniny pa-viaskovamu (35 000 b.r.)
Biarozavik z čarnicami (15 000 b.r.)

Karaciej, standartny nabor biełaruskaj ježy, akramia sousu, kaniečnie. Usio heta razam kaštavała 172 000 b.r. Dastaŭka ježy ŭ eDranik biaspłatnaja, ale minimalnaja suma zamovy składaje 160 000 b.r. Tamu chočaš nie chočaš, a na 160 tysiač pryjdziecca čahości nabirać. Tamu lepiej zamaŭlać u haściach ci ź siabrami: tam i mienš zmožacie ŭziać, i tańniej vam abydziecca.

Pryvieźci abiacali maksimum praz 1 hadzinu 10 chvilin. Pakul hatujecca i jedzie ježa, možna pačytać artykuł Źmitra Daškieviča pra biełaruskuju movu ŭ kaviarniach.

Ad telefanavańnia da dastaŭki ježy prajšło ŭsiaho 38 chvilin, jak užo kurjer hrukaje ŭ dźviery. Pryjemny chłopiec uschodniaha vyhladu pryvioz dva pakiety, ź jakich išoŭ duža smačny pach. Chłopiec byŭ u vyšymajcy ad symbal.by. Raźličyŭšysia, jon pažadaŭ «prijatnoho appietita» i pabieh.

I tut pieršaja prablema: u zamovie adsutničaŭ biarozavik, za jaki hrošy byli addadzienyja, nie było čeku, a zamiest syrnaha sousu Heinz pakłali dźvie śmiatany.

My patelefanavali ŭ call-centr, dziaŭčyna vybačyłasia i paabiacała viarnuć kurjera ŭ vyšymajcy. Praz 20 chvilin kurjer viarnuŭsia, paprasiŭ prabačeńni za niazručnaści, addaŭ biarozavik i ček. Čas zateścić ježu.

Sałata

Sałata akazałasia śviežaj. Składałasia ŭražańnie, što babula voś tolki narvała harodniny z aharodu i źmiašała heta ŭsio ŭ adnu talerku. Taki lohki, letni kaktejl z harodniny. U składzie pamidory, ahurki, krop dy radyska. Dobraje vyjście dla tych, chto na dyjecie. Ale radysu było zašmat, što rabiła stravu harkavaj.

Draniki z hrudzinkaj dy hrybami

Draniki zalikovyja. Ale zusim niazručny posud prydumali da ich. Skažycie, nu chto kładzie draniki ŭ skryniu dla kitajskaj łokšyny? Kali jasi, tam z dranikaŭ kaša robicca.

A tak, kali nie zaŭvažać hety fakt, to smak vielmi prystojny. Usio prasmažana, jak byccam hatavałasia ŭ viaskovaj piečy. Harniru było dastatkova. Spałučeńnie hryboŭ, šynki, cybuli i niejkaha sousu davała cudoŭny pach i smak.

Bulba pa-viaskovamu

7 kavałkaŭ bulby ŭ nievialičkaj pušcy. Pa sutnaści, ničym nie roźnicca ad bulby ŭ minskich fast-fudach. Syrnaha sousu tak i nie dali, tamu budziem jeści sa śmiatanaj. Zrazumieła, što lepiej niedasalić, čym pierasalić, ale hetyja kuchary dakładna nikoli nie zakachajucca. Soli nie było ni hrama. Chacia mo kamu i padabajecca. Karaciej, na amatara.

Paśla treciaha kavałka bulby stanovicca sucha ŭ horle, navat sa śmiatanaj. Tamu abaviazkova treba, kab u vas było niešta pad rukoj papić. Ale kali jeści razam z sałataj, to mahčyma budzie nie tak už i kiepska.

Biarozavik z čarnicami

Paśla takoj ježy sa stoadsotkavaj vierahodnaściu vam zachočacca pić. EDranik prapanoŭvaje try vidy biarozaviku: zvyčajny, z čarnicami i z šypšynaj. Što ź siabie ŭjaŭlaje biarozavik z čarnicami? Na pach i smak nie adčuć hetych čarnic, ale adčuć sapraŭdny smak biarozavaha soku. Karaciej, na zapić vam chopić.