Siońnia — apošni dzień zboru podpisaŭ u padtrymku vyłučeńnia kandydataŭ u prezidenty Biełarusi. Zbor podpisaŭ pačaŭsia 23 lipienia.
Zdać sabranyja podpisy ŭ terytaryjalnyja vybarčyja kamisii inicyjatyŭnyja hrupy pavinny da 19.00 21 žniŭnia.
Na hety čas pra zbor 100 tysiač podpisaŭ, nieabchodnych dla rehistracyi kandydatam u prezidenty, zajavili piać pretendentaŭ — Alaksandr Łukašenka, Siarhiej Hajdukievič, Siarhiej Kalakin, Taćciana Karatkievič i Viktar Ciareščanka.
Anatol Labiedźka napiaredadni pryznaŭ, što jaho hrupie nie ŭdałosia sabrać 100 tysiač podpisaŭ. «Viadoma, mahli sabrać, ale my pajšli na ekśpierymient, arhanizavaŭšy vyklučna vałanciorskuju kampaniju. I my zaraz viedajem ludziej, jakija pojduć na ŭsio, tamu što ŭ ich jość pierakanańni», — skazaŭ staršynia Abjadnanaj hramadzianskaj partyi 20 žniŭnia na pikiecie «Za sumlennyja svabodnyja vybary!». «Kali b heta byli vybary, to my b uklučyli i finansavy składalnik i sabrali», — dadaŭ jon.
Pa ŭsioj bačnaści, nie atrymajecca sabrać nieabchodnuju kolkaść podpisaŭ i inicyjatyŭnaj hrupie Siarhieja Kalakina.
Žanna Ramanoŭskaja dahetul nie paviedamlała pra kolkaść sabranych podpisaŭ, adnak, kali ŭličyć małalikaść jaje inicyjatyŭnaj hrupy i małaviadomaść samoj pretendentki, vidavočna, što jana taksama vybyvaje z prezidenckaj kampanii.
Pavodle kalandarnaha płana CVK, rehistracyja kandydataŭ u prezidenty pavinna prajści z 6 pa 15 vieraśnia. Adnak, jak zajaŭlała kiraŭnik Centrvybarkama Lidzija Jarmošyna, razhledzieć pytańnie pra rehistracyju kandydataŭ CVK płanuje na pasiadžeńni 10 vieraśnia. Paśla atrymańnia adpaviednych paśviedčańniaŭ kandydaty ŭ prezidenty zmohuć pačać pieradvybarnuju ahitacyju.
Piatyja vybary prezidenta Respubliki Biełaruś projduć 11 kastryčnika.
