Padčas matča płej-of kvalifikacyi Lihi čempijonaŭ BATE— «Partyzan» milicyja zatrymała biełaruskaha zaŭziatara ŭ majcy z hierbam «Pahonia».
«Ja adsiadzieŭ na trybunie pieršy tajm. Kali byŭ pierapynak, adyšoŭ kupić vady, viarnuŭsia. A tut AMAP: «Projdziem». Mnie skazali, što hierb «Pahonia» ŭ nas zabaronieny. Mianie zaviali ŭ aŭtobus», — uzhadvaje Uładzimir, jaki ŭ vyniku prapuściŭ uvieś druhi tajm i nie pabačyŭ, jak Michaił Hardziajčuk zabiŭ adziny hoł u varoty haściej.
Mužčyna śćviardžaje, što nie cikavicca palitykaj, ale «Pahoniu» ličyć histaryčnym biełaruskim simvałam. Tamu i vyrašyŭ, što futbolnaja hulnia — samaje darečnaje miesca dla taho kab apranuć «kramolnuju», jak akazałasia, majku, jakuju jamu niadaŭna padaryli na Dzień naradžeńnia.
«Ničoha žachlivaha ŭ hetym aŭtobusie nie adbyvałasia. Adzinaje, što mianie abazvali apazicyjanieram, — praciahvaje Uładzimir. —Mnie patłumačyli, što pryjści na futboł ja moh ź simvolikaj BATE albo «Partyzana». Kali b ja źjaviŭsia ŭ majcy ź siońniašnim dziaržaŭnym hierbam, to mnie b taksama ničoha nie pradjavili. Na futboł ja pryjšoŭ ź siabrami, adzin ź ich siłavik. Jon mianie zabraŭ i prychapiŭ z saboj majku. A tak, mianie, jak jon skazaŭ, pasadzili b na sutki ŭ metach prafiłaktyki».
Uładzimir paviedamlaje pra jašče adnaho chłopca, jakoha zaviali ŭ aŭtobus za «kramolny» šalik.
«Jak skazali amapaŭcy, na šaliku było niešta «z čarciami». Što tam było mienavita, ja dakładna nie skažu. Hetaha chłopca pavieźli na Budaŭnikoŭ, 14 u adździaleńnie milicyi», — zakančvaje apovied pra pryhody na futbole Uładzimir.
U toj ža čas siłaviki nie źviartali ŭvahi na impierski ściah, što vyviesili na haściavoj trybunie fanaty maskoŭskaha CSKA, jakija pryjechali padtrymać sierbaŭ. U tym liku, i hety simvał vykarystoŭvaŭsia jak aficyjny ŭ Rasijskaj Impieryi. A siońniašnija jaho prychilniki — najčaściej asoby ultrapravych pohladaŭ — vystupajuć za pašyreńnie miežaŭ sučasnaj Rasii z uklučeńniem tudy Biełarusi, Ukrainy. Hramadskaja arhanizacyja FARE (Futboł suprać rasizmu ŭ Jeŭropie), jakaja supracoŭničaje z UEFA, ličyć hety simvał pravakacyjnym.
Padčas hulni BATE-Partyzan la impierskaha ściaha krucilisia supracoŭniki ŭ cyvilnym z racyjami, ale vystaŭlać pretenzii pryjezdžym fanatam nichto nie staŭ. Zamiest hetaha siłaviki pieraklučylisia na svaich, choć i «Pahonia», i bieł-čyrvona-bieły ściah źjaŭlalisia dziaržaŭnymi simvałami ŭ pačatku 1990-ch.
