Sačyć za kolkaściu podpisaŭ, sabranych patencyjnymi kandydatami ŭ prezidenty, — zajmalnaja sprava. Nastolki niejmaviernymi vyhladajuć ahučvanyja ličby.

Sparynh-partniory supierničajuć za miesca «pieršaha siarod inšych». Ni Siarhiej Hajdukievič, ni Viktar Ciareščanka, ni Mikałaj Ułachovič ni słovam nie krytykujuć Alaksandra Łukašenki, ale zmahajucca miž saboj. Ličbami.

Što adbyłosia za apošni tydzień zboru podpisaŭ?

14 žniŭnia Viktar Ciareščanka raskazaŭ pra 135 tysiač sabranych podpisaŭ. Jahony štab na čale «hienierał-majoram» i pradstaŭnikom «Vialikaha bractva kazackich vojskaŭ Rasijskaj Fiederacyi» ŭ Biełarusi Aleham Nieściarkovym zajaviŭ, što zbor podpisaŭ praciahniecca. Dekłaravaŭsia namier adnieści ŭ CVK da 250 tysiač podpisaŭ — hetyja ličby dazvolili b harantavana stać druhim paśla Łukašenki.

Ale ŭ vyniku Ciareščanka zdaŭ Jarmošynaj… 130 tysiač podpisaŭ. Apošni tydzień jahony štab zajmaŭsia tym, što vykreślivaŭ sabranyja podpisy?

Mikałaj Ułachovič kiravaŭsia prostaj schiemaj. «U nas, u adroźnieńnie ad inšych, jość strohi płan-hrafik, jakim my kirujemsia», — patłumačyŭ kiraŭnik jahonaha štaba Michaił Vobrazaŭ. Pieršyja try tydni zboru podpisaŭ jahony štab nazyvaŭ ličby pa formule «paradkavy numar dnia zboru pamnožyć na 4000». Plus/minus 1000 čałaviek.

3 žniŭnia (12 dzień) — 47500 čałaviek

9 žniŭnia (18 dzień) — 72 000 čałaviek

11 žniŭnia (20 dzień) — 79 000 čałaviek

13 žniŭnia (22 dzień) — 87 000 čałaviek.

Tym časam kankurenty ŭžo adčytalisia, što sabrali patrebnyja podpisy. 14 žniŭnia pra heta abvieściła apošniaja ź ich, Taćciana Karatkievič. Nie adstavać ža atamanu? I tamu za hety dzień kolkaść podpisaŭ Ułachoviča pryrasła na 13 tysiač. «100 tysiač sabrana», — adrapartavaŭ ataman.

Nu a paśla uklučyŭsia raniejšy «strohi płan-hrafik» — dadavać pryblizna pa 4 tysiačy na dzień.

U vyniku pradstaŭniki Ułachoviča adnosili ŭ terytaryjalnyja kamisii 132 tysiač podpisaŭ — bolš za Ciareščanku.

* * *

Jak vyjaviłasia, za apošni dzień zboru podpisaŭ Mikałaj Ułachovič znajšoŭ jašče kala 30 tysiač podpisaŭ. Ahułam jahonyja pradstaŭniki zdali ŭ terytaryjalnyja kamisii 160 tysiač podpisaŭ.

* * *

Narešcie, Siarhiej Hajdukievič. Pretendent zajaviŭ, što mieŭ 100 tysiač sabranych podpisaŭ jašče 7 žniŭnia. «Ahułam chočam zdać u CVK kala 120 tysiač pravieranych podpisaŭ, kab nie było nijakich pretenzij», — udakładniŭ tady Hajdukievič. Hetaja kolkaść faktyčna harantavała b jamu pieršaje miesca siarod sparynh-partnioraŭ.

Adnak kali Ciareščanka i Ułachovič pačali kidacca ličbami, daviałosia dziejničać i Hajdukieviču. U vyniku jon adnios u terytaryjalnyja kamisii 141 tysiaču podpisaŭ.

* * *

Vynikovyja ličby padadzienych podpisaŭ:

1. Łukašenka — 1 761 145

2. Ułachovič — 159 805

3. Hajdukievič — 140 735

4. Ciareščanka — 130 404

5. Karatkievič — 107 299

* * *

Pavieł Znaviec: «Hajdukievič i Ciareščanka sabrali nie bolš za 2000 podpisaŭ, ražany ataman — uvohule»

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?