Jakija tolki dzivosy nie adbyvajucca ŭ našaj Biełarusi! Heta ž treba: prezident krainy publična ŭcior nos byłomu pieršamu sakrataru Bresckaha abkama kampartyi, a zatym pieršamu sakrataru CK Kampartyi Biełarusi Jafremu Sakałovu.
3 minułaj piatnicy ŭsie telekanały kruciać siužet pra sustreču A.Łukašenki z kalektyvam adkrytaha akcyjaniernaha tavarystva «Biełaviežski» Kamianieckaha rajona. Zadavoleny jon siońniašnimi vynikami raboty hetaj haspadarki. Jak zadavoleny i tym, što «Biełaviežski» ŭziaŭ na buksir susiedni kałhas «Sovietskaja Biełoruśsija» (u apošni čas jon ličyŭsia sielskahaspadarčym kaapieratyvam).
Toj, chto niekali cikaviŭsia viaskovymi spravami, u šoku: jak mahło stać, što «Sovietskaja Biełoruśsija» akazałasia nastolki ŭ adstałych, što jaje daviałosia brać na buksir? Za što tady jaje niaźmiennamu staršyni Uładzimiru Biadulu načapili spačatku adnu załatuju zorku Hieroja Sacyjalistyčnaj pracy, a potym i druhuju? Pry hetym da paŭtornaha ŭznaharodžańnia Biaduli zorkaj Hieroja mieŭ pramoje dačynieńnie tahačasny pieršy sakratar Bresckaha abkama partyi Jafrem Sakałoŭ. Bieź jaho pachvalnych charaktarystyk nie mahli zaćvierdzić takoje rašeńnie ŭ Kramli.
Ale: ž kolki šyła ŭ miašku ni chavaj, jano vylezie na pavierchniu. Tak atrymałasia i z kałhasam «Sovietskaja Biełoruśsija». Za pustazvonstvam, schilnaściu da pakazuchi, umieńniem pryhoža sustreć vysokich haściej i začaravać ich za bahatym stałom u Biełaviežskaj puščy chavałasia zvyčajnaja biezdapamožnaść va ŭkaranieńni pieradavych sielskahaspadarčych technałohij, rynačnych adnosin. Adzinaja halina, u jakoj kałhas mieŭ niejki pośpiech, — heta bulbavodstva. I to kali, skažam, u kałhasie imia Kirava Pinskaha rajona tady źbirali z 420 hiektaraŭ na kruh pa 360 centnieraŭ kłubniaŭ, to ŭ «Sovietskoj Biełoruśsii» i blizka nie nabližalisia da takoha vałavoha zboru. A što tyčycca zbožžavych kultur, to haspadarka Biaduli nikoli nie ŭvachodziła ŭ lik lepšych u krainie. Jak i pa pakazčykach u žyviołahadoŭli. Dy i «latajučy mužyk» (tak niekali nazvaŭ Uładzimira Biadulu adzin viadomy maskoŭski paet) staraŭsia nie pakazvać fiermy pryjezdžym haściam. Nie było na što hladzieć: zvyčajnyja chlavy biez asablivaj miechanizacyi, z raźlikam u bolšaści na ručnuju pracu dajarak, śvinarak, dahladčykaŭ.
Sustrakaŭ Biadula haściej u Domie kultury, dzie mieściŭsia, jak padkreślivałasia, pieršy ŭ SSSR Muziej chleba. I, viadoma ž, pobač — restaran, u jakim haściej davodzili da kandycyi, kab im nie chaciełasia leźci ŭ hnoj, a lepš vyjechać u pušču i tam, taksama za bahatym stałom, praciahnuć havorku i padychać biełaviežskim vodaram.
Kali narešcie dvojčy Hieroja Sacyjalistyčnaj Pracy U. Biadulu ź ciažkaściu ŭdałosia adpravić na piensiju, usim stała viadoma, jaki pył puskaŭ jon u vočy vysokim haściam i tym, chto jamu viešaŭ adnu zorku Hieroja za druhoj. U minułuju piatnicu ja viečaram hladzieŭ «Panaramu». «U siužecie pra naviedvańnie «Biełaviežskaha» Alaksandr Łukašenka raskazvaŭ, jak jon adnojčy nie palenavaŭsia i sam, užo paśla sychodu Biaduli z «Sovietskoj Biełoruśsii», zazirnuŭ ŭ jaho karoŭniki, cialatniki, śvinarniki: hnoju pa kalena, umovy dla raboty ludziej žudasnyja… Voś čamu i vyrašana było dałučyć kałhas, jaki sorak hadoŭ uznačalvaŭ Uładzimir Biadula, da AAT «Biełaviežski». I, jak śviedčyli ŭ «Panaramie» viaskoŭcy, heta vyratavała ich ad zaniapadu. Kali da abjadnańnia, u 2010-m, siaredni zarobak u byłym kałhasie składaŭ 651 tysiaču rublou, to ŭ pieršy hod paśla dałučeńnia — 1,3 miljona rubloŭ, a letaś — 5,3 miljona rubloŭ. Uradžajnaść zbožžavych padskočyła z 33 centnieraŭ amal da 55. Nieparaŭnalnyja ličby i ŭ žyviołahadoŭli.
Tak, Alaksandr Łukašenka, prachodziačy sa śvitaj pa čyścieńkim, technałahična sučasnym žyviołahadoŭčym kompleksie, što pobač ź vioskaj Rasna, jakaja raniej była centram kałhasa «Sovietskaja Biełoruśsija», prademanstravaŭ tamu ž Jafremu Sakałovu styl kolišniaj raboty, kali jon razam z kramloŭskimi starcami viešaŭ zorki nie za sapraŭdy vysoki ŭzrovień raboty, nie za rekordnyja dasiahnieńni ŭ vytvorčaści sielskahaspadarčaj pradukcyi, nie za navatarskija padychody ŭ raźvićci ahrapramysłovaj haliny, a za pył, jaki mahli puskać u vočy Biadula i jamu padobnyja.
P.S. Zaŭvažym: Jafrem Sakałoŭ taksama źjaŭlajecca Hierojem Sacyjalistyčnaj pracy. Bolš za toje, pa śpiecyjalnym ukazie A. Łukašenki jon adnosicca da liku tych byłych partyjnych i savieckich funkcyjanieraŭ, jakija siońnia atrymlivajuć nadzvyčaj vysokuju piensiju i peŭnyja lhoty. Kali, naprykład, u eks-staršyni Viarchoŭnaha Savieta 12-ha sklikańnia Stanisłava Šuškieviča siońnia piensija ŭ miežach paŭdołara, dyk u Jafrema Sakałova, možna mierkavać, jana prykładna ŭ tysiaču razoŭ bolšaja.
