Niadaŭna zorkaj internetu staŭ biełaruskamoŭny azierbajdžaniec, jaki pradaje kavuny. «Naša Niva» adšukała cikavaha pradaŭca i pahutaryła ź im pra biełarusaŭ, movu i kavuny.
Kala vychada z Zachodniaha rynku staić nievialikaha rostu mužčyna. Ludzi padychodziać, prosiać vybrać i kuplajuć. U adkaz Ramil im kaža: «Dziakuj vialiki, smačna jeści!»
«Ja užo 19 hadoŭ u Biełarusi. Mnie vielmi padabajecca tut, bo narod u vas dobry. Mnie padabajecca, jak tut staviacca da azierbajdžancaŭ», — raspaviadaje Ramil.
«Pracujem, imkniemsia znajści supolnuju movu ź ludźmi. Mnie vielmi padabajecca biełaruskaja mova. Sprabuju trochi razmaŭlać. Za 19 hadoŭ tolki durynda nie vyvučyć biełaruskuju movu!» — usimichajecca jon.
Ramil — vielmi saramlivy. Ale kali my raspaviali historyju jaho znakamitaści, jon adrazu paklikaŭ svaich kaleh, kab jany pahladzieli artykuł «NN».
«Ja jašče tolki vyvučaju biełaruskuju movu. Kali ja nie razumieju niejkaha słova, to pytajusia pra jaho značeńnie ŭ miascovych». Ramil zaznačaje, što bolšaść dośviedu atrymlivaje ad staroha pakaleńnia.
«Mnie padajecca, što biełarusy nie bajacca svajoj movy, jany prosta saromiejucca. Chacia mahčyma jany mohuć dumać, što na ich niejak nie tak pahladziać. A mnie cikava, mnie niama čaho saromiecca — heta ž mova prodkaŭ».
Ramil kaža, što dla pačatku vyvučaŭ frazy. «Ja kazaŭ: «Kali łaska, padychodźcie biez čarhi!». Paśla kazaŭ: «Možacie hrošy zaŭtra prynieści!».
Paśla pryjemnaj razmovy Ramil vyrašyŭ padaryć kavun redakcyi. Jon uzvažyŭ kavun pad 9 kiłahram, a paśla spytaŭsia: «A kolki ŭ vas u redakcyi čałaviek? Treba jašče bolš!» Na pytańnie, jak abrać dobry kavun, Ramil adkazaŭ, što ź im treba pravieści hadoŭ 15, kab zrazumieć, jaki kavun samy lepšy.
Ad lubych hrošaŭ jon admaŭlaŭsia, naprykancy hučna pramoviŭ: «Dziakuj vam, siabry!». U redakcyi adznačyli: kavun — zalikovy!
Biezumoŭna, astatnija pradaŭcy zaŭvažyli, jak chtości biare intervju. Pobač stajaŭ azierbajdžaniec i spytaŭsia, ci nie zamiežniki my. «Prosta vy nie pa-rusku razmaŭlajecie, a pa-biełarusku, voś i padumaŭ, što vy zamiežniki».
