Nina Žyźnieŭskaja z Homiela, maci hieroja ŭkrainskaha Majdanu Michasia Žyźnieŭskaha, prachodzić miedycynski ahlad u Kijevie — na zaprašeńnie Ministerstva achovy zdaroŭja Ukrainy.
Dapamahčy joj u hetym abiacaŭ ukrainski prezident Piatro Parašenka ŭ listapadzie 2014 h., kali Nina Vasiljeŭna z mužam byli ŭ jaho na pryjomie. Niezadoŭha da trahičnych revalucyjnych padziej u Kijevie Žyźnieŭskaja pieraniesła składanuju apieracyju, da taho ž jana cierpić na hipiertaniju i cukrovy dyjabiet.
Adnačasova maci čakaje i aficyjnaha statusu dla niabožčyka-syna — prezident Ukrainy padčas pryjomu nie tolki ŭručyŭ baćkam orden Hierojaŭ Niabiesnaj Sotni, jakim uznaharodžany syn paśmiarotna, ale i asabista abiacaŭ nadać Michasiu Žyźnieŭskamu zvańnie Hieroja Ukrainy. Heta nie było zroblena adrazu z taje pryčyny, što pavodle ŭkrainskaha zakanadaŭstva najvyšejšym zvańniem mohuć być uhanaravanyja tolki hramadzianie Ukrainy.
Źmieny ŭ zakanadaŭstva Viarchoŭnaja Rada nie ŭnosiła, tamu, chutčej za ŭsio, jak miarkuje Nina Žyźnieŭskaja, budzie vykarystany inšy varyjant: Mišu pryznajuć hramadzianinam Ukrainy, paśla čaho ŭhanaravańnie jaho najvyšejšym zvańniem nie budzie piarečyć ukrainskamu zakanadaŭstvu.
