Saŭmin i Nacbank sumiesnaj pastanovaj zaćvierdzili antyinflacyjnuju prahramu, jakaja praduhledžvaje šerah mierapryjemstvaŭ u halinie hrašova-kredytnaj, biudžetna-padatkovaj, cenavaj palityki, antymanapolnaha rehulavańnia, a taksama arhanizacyjnyja miery.
U adpaviednaści z pastanovaj № 733/17 ad 31 žniŭnia 2015 hoda «dla stvareńnia ŭmoŭ dla paskareńnia ekanamičnaha rostu i pavyšeńnia efiektyŭnaści ekanamičnaj palityki» respublikanskim orhanam dziaržkiravańnia i inšym dziaržarhanizacyjam, padparadkavanym Saŭminu, abłvykankamam i Minharvykankamu, daručana ličyć pryjarytetnaj zadačaj źnižeńnie inflacyi ŭ 2015—2016 hadach i daviadzieńnie jaje ŭzroŭniu z 2017 hoda da adnaznačnaha čysła.
Dadziena ŭkazańnie štokvartalna da 15-ha čysła miesiaca, što idzie za spravazdačnym kvartałam, padavać u Minekanomiki infarmacyju pra chod realizacyi prahramy. U svaju čarhu Ministerstva ekanomiki pavinna ažyćciaŭlać manitorynh jaje vykanańnia i štokvartalna 25-ha čysła miesiaca, što idzie za spravazdačnym kvartałam, infarmavać urad pra chod jaje realizacyi.
U častcy biudžetna-padatkovaj palityki finansavańnie dziaržprahram i mierapryjemstvaŭ u 2015 hodzie pavinna być zabiaśpiečana na sumu nie bolš jak 44,2 trłn. rubloŭ, u 2016 hodzie — nie bolš jak na 42 trłn. rubloŭ.
Akramia hetaha, prahrama praduhledžvaje padtrymańnie stanoŭčych u realnym vyražeńni stavak hrašovaha rynku, praviadzieńnie hrašova-kredytnaj palityki ŭ režymie manietarnaha tarhietavańnia, padtrymańnie zbałansavanaj situacyi na ŭnutranym valutnym rynku, u tym liku za košt ažyćciaŭleńnia hnutkaj kursavoj palityki, zabieśpiačeńnie zbałansavanych tempaŭ rostu šyrokaj hrašovaj masy.
U 2016 hodzie płanujecca praviadzieńnie akcyznaj palityki, jakaja praduhledžvaje ŭstanaŭleńnie stavak akcyzaŭ u dačynieńni da ałkaholnaj i tytuniovaj pradukcyi z ulikam uzhodnienych u JEAES paramietraŭ harmanizacyi i nieabchodnaści zachavańnia kankurentazdolnaści ajčynnaj pradukcyi.
Staŭki akcyzaŭ na aŭtamabilnyja bienziny i dyzielnaje paliva buduć zachavanyja na ŭzroŭni 2015 hoda. Praduhledžvajecca paetapnaja indeksacyja stavak akcyzaŭ na haz, jaki vykarystoŭvajecca ŭ jakaści aŭtamabilnaha paliva, i masła dla aŭtamabilaŭ z dyzielnymi i (ci) karbiuratarnymi (inžektarnymi) ruchavikami ŭ miežach prahnazavanaha paramietru inflacyi (ŭ cełym na 12% z raźbiŭkaj pa paŭhodździach).
Cenavaja palityka praduhledžvaje raspracoŭku darožnaj karty źmianieńnia rehulavanych cen (taryfaŭ) na tavary (pasłuhi), paetapnaje skaračeńnie pierakryžavanaha i biudžetnaha subsidziravańnia žyllova-kamunalnych i transpartnych pasłuh u paramietrach, praduhledžanych prahnozam sacyjalna-ekanamičnaha raźvićcia krainy. Zapłanavana ŭdaskanaleńnie taryfnaj palityki ŭ śfiery paliŭna-enierhietyčnych resursaŭ dla spažyŭcoŭ realnaha siektara ekanomiki i aptymizacyja pamieru aptovych i handlovych nadbavak, što prymianiajucca na lekavyja srodki i vyraby miedycynskaha pryznačeńnia.
Arhanizacyjnyja miery siarod inšaha ŭklučajuć stabilizacyju cenavaj situacyi na rynku spažyvieckich tavaraŭ šlacham praviadzieńnia zakupačnych i tavarnych interviencyj.
Ab tym, što ŭrad i Nacbank pavinny ŭ 2015 hodzie vypracavać peŭnuju antyinflacyjnuju prahramu, zajaviŭ Alaksandr Łukašenka, vystupajučy 29 krasavika z pasłańniem da naroda i parłamienta. «Makraekanamičnaja stabilnaść — heta załoh narmalnaha biźniesu, źnižeńnie inflacyi dla nas — pryjarytetnaja zadača», — padkreśliŭ jon.
Pry hetym kiraŭnik dziaržavy adznačyŭ: nasielnictva Biełarusi taksama tryvožyć rost cen. «Ale vy viedajecie, u asnoŭnym ceny ŭ nas rastuć ad Kabiakova (premjer-ministra), ad ministraŭ. My ž sami pastajanna uźnimajem hetyja ceny, majučy na ŭvazie, što i pa ŽKH narod niedapłačvaje, i abjeŭsia narod — vielmi nizkija ceny na pradukty charčavańnia, i enierhietyka ŭ nas biednaja, pakutuje — treba padniać naftapierapracoŭcy, inšym enierhietyčnym pradpryjemstvam dachody, jany, bačycie, madernizujucca, niebaraki, «zarpłata ŭ nas nizkaja», i pajšło-pajechała. Hetaha bolš być nie pavinna», — zajaviŭ Łukašenka.
Nahadajem, asnoŭnymi kirunkami hrašova-kredytnaj palityki Biełarusi na 2015 hod pryrost cen praduhledžany nie bolš jak na 12%. Adnak u kancy studzienia metavy aryjencir inflacyi ŭ 2015 hodzie byŭ vyznačany Nacbankam na ŭzroŭni 18% z dapuščalnym adchileńniem u 2%.
Pa vynikach siami miesiacaŭ 2015 hoda inflacyja ŭ Biełarusi skłała 7,5%. Nacbank ličyć, što pa vynikach hoda inflacyja budzie blizkaja da nižniaj miažy prahnozu — 16%. Što da 2016 hoda, to pakul hałoŭny bank krainy prahnazuje inflacyju na ŭzroŭni 12%.
