Budučyja prezidenckija vybary ŭ Biełarusi źjaŭlajucca łakmusavaj papierkaj dla acenki šansaŭ pa pierazahruzcy adnosin pamiž Biełaruśsiu i Jeŭrasajuzam, zajaviŭ 3 vieraśnia ŭ Minsku kaardynatar fiederalnaha ŭrada Hiermanii pa mižhramadskim supracoŭnictvie z Rasijaj, krainami Centralnaj Azii i Uschodniaha partniorstva Hiernat Erler.
Na sustrečy z žurnalistami jon, u pryvatnaści, adznačyŭ, što nahodaj dla jaho vizitu ŭ Minsk pasłužyła vyzvaleńnie 22 žniŭnia šaściarych palitźniavolenych i «źviazanyja z hetym čakańni biełaruskaha kiraŭnictva ŭ tym, što tyčycca reakcyi na heta Zachadu».
«Prablema palitźniavolenych šmathadovaja, jana źjaŭlałasia pieraškodaj dla narmalizacyi adnosin pamiž Jeŭrasajuzam i Biełaruśsiu», — skazaŭ Erler.
Zhodna ź jaho słovami, pavodle daručeńnia ŭrada Hiermanii na sustrečy ź ministram zamiežnych spraŭ Biełarusi Uładzimiram Makiejem 3 vieraśnia ŭ Minsku Erler paviedamiŭ, što hety krok vitajecca i aceńvajecca stanoŭča.
«Hety krok adkryvaje mahčymaści dla taho, što ŭ mižnarodnym płanie zavuć pierazahruzkaj adnosin, — zajaviŭ jon. — Viadoma, chaciełasia b, kab hety pieršy krok mieŭ praciah. U jakaści vyrašalnaj padziei my majem na ŭvazie vybary, jakija źjaŭlajucca łakmusavaj papierkaj dla acenki šansaŭ na pierazahruzku».
Jak adznačyŭ Erler, kali vybary projduć sumlenna i nahladalnaja misija BDIPČ ABSIE budzie mieć mahčymaść bieśpieraškodna ažyćciaŭlać pracu pa nazirańni za imi, to heta «aŭtamatyčna adčyniaje dźviery pierad Jeŭrasajuzam i Hiermanijaj dla palapšeńnia adnosin».
Pradstaŭnik Hiermanii padkreśliŭ, što da 30 kastryčnika pavinna być pryniataje rašeńnie pa pytańni ab sankcyjach ES u dačynieńni da Biełarusi. «Kali acenka vybaraŭ budzie stanoŭčaj, budzie adkryty šlach u kirunku prypynieńnia sankcyj i pačatku palityčnaha dyjałohu pa sutnaści, — skazaŭ niamiecki čynoŭnik. — U miežach hetaha dyjałohu hatovyja pryjści da supracoŭnictva pa šerahu kirunkaŭ, jakija ŭjaŭlajuć cikavaść dla Biełarusi, u tym liku pa pieramoŭnym pracesie ab ablahčeńni vizavaha režymu, mahčymaści praviadzieńnia ŭ nastupnym hodzie inviestycyjnaj kanfierencyi, akazańni padtrymki Biełarusi pa ŭvachodžańni ŭ SHA».
Erler taksama adznačyŭ, što Makiej zajaviŭ pra hatoŭnaść biełaruskaha boku «na vybarach pajści ŭ padtrymku čakańniaŭ Zachadu, u tym liku ŭ tym, što tyčycca pracy nahladalnaj misii, i takim čynam adkryć mahčymaść dla raźvićcia adnosin».
Pakolki ŭ nastupnym hodzie Hiermanija budzie staršynioj u ABSIE, na sustrečy z Makiejem było zakranutaje i pytańnie pra budučyniu hetaj arhanizacyi, paviedamiŭ Erler. U pryvatnaści pradstaŭnik Hiermanii padkreśliŭ nieabchodnaść adkryć u Biełarusi techničny ofis ABSIE, jaki budzie akazvać padtrymku pa realizacyi sumiesnych prajektaŭ. Pavodle słoŭ Erlera, Makiej zajaviŭ pra hatoŭnaść Biełarusi da pašyreńnia supracoŭnictva z ABSIE.
