Jana skazała, što na pasiadžeńni CVK, jakoje zaplanavanaje na 10 vieraśnia, budzie rekamendavać kaleham zarehistravać usich čatyroch u jakaści kandydataŭ na prezydenta. Pry ŭmovie, što sami pretendenty pažadajuć praciahvać vybarčuju kampaniju.
Jana patłumačyła, što kandydaty pavinny napisać zajavy pra svajo žadańnie balatavacca i zdać poŭny kamplekt nieabchodnych dakumentaŭ. Pakul, udakładniła Jarmošyna, heta zrabili tolki Siarhiej Hajdukievič i Taciana Karatkievič.
A admova ad zajavy ci niapoŭny kamplekt dakumentaŭ — padstava dla admovy ŭ rehistracyi.
Što tyčycca jašče čatyroch pretendentaŭ — Ciareščanki. Labiedźki, Kalakina i Ramanoŭskaj — budzie pryniataja ahulnaja pastanova, što kožny ź ich nie nabraŭ nieabchodnyja 100 tysiač sapraŭdnych podpisaŭ.
«Ja dumała, što i Labiedźka z Kalakinym źbiaruć pa 100 tysiač. I nie spadziavałasia, što takaja historyja adbudziecca ź Ciareščankam. Mnie padavałasia, što sioleta budzie scenar 2010 hodu i abstaviny składucca padobnym čynam, jak tady».
Staršynia CVK paviedamiła, što dosyć vysoki pracent niesapraŭdnych podpisaŭ byŭ u Mikałaja Ułachoviča — dzieści 13,8%. A 15% užo dajuć prava zdymać kandydata z vybarčaj honki.
Ułachovič straciŭ 10 tysiač podpisaŭ. Pa dźvie tysiačy adminusavali ŭ Hajdukieviča i Karatkievič. Navat u Łukašenki znajšli 7,5 tysiačy niesapraŭdnych podpisaŭ. Ale ŭ jaho podpisaŭ vielmi šmat.
Treba skazać, što ŭ vypadku, kali Tacianu Karatkievič 10 vieraśnia zarehistrujuć, to heta budzie pieršym vypadkam udziełu kandydata-žančyny ŭ prezydenckich vybarach.
Jarmošyna ŭdakładniła, što niekatoryja błytajuć, kali kažuć, što ŭ 2001 hodzie balatavałasia Natalla Mašerava.
Inicyjatyŭnuju hrupu spadaryni Mašeravaj tady zarehistravali. Ale litaralna praź niekalki dzion paśla hetaha Mašerava padała zajavu, u jakoj paviedamiła, što nia budzie źbirać podpisy.
