Rasiejski časopis «Forbs» apublikavaŭ sioletni rejtynh najbahaciejšych žančyn Rasii. Na pieršym miescy — Alena Baturyna, žonka byłoha mera Maskvy Łužkova.

Na druhim — Natalla Łucenka, jakaja naradziłasia ŭ Biełarusi i pačynała tut svoj biznes.

Natalla Łucenka razam z mužam Alaksandram vałodaje HK «Sodružiestvo» («Sadružnaść»). Asnoŭnyja napramki biznesu heta handal karmami i łahistyka. «Forbs» aceńvaje majomaść Łucenka ŭ $550 młn. Darečy, ŭ minułym hodzie Natalla była tolki na 4 miescy rejtynhu z $325 młn.

«Sodružiestvo-Soja» — najbujniejšy alejna-ekstrakcyjny zavod u Rasii. Naležyć HK «Sodružiestvo». Fota ITAR_TASS

«Sodružiestvo-Soja» — najbujniejšy alejna-ekstrakcyjny zavod u Rasii. Naležyć HK «Sodružiestvo». Fota ITAR_TASS

Natalla i jaje muž Alaksandr Łucenka pačynali biznes u 1994 hodzie ŭ Minsku. Jany handlavali karmami i karmavymi dabaŭkami, paźniej kupili niekalki ptuškafabryk ŭ Rasii i Ukrainie. Potym — zavod pa vytvorčaści białkova-vitaminnych dabavak u Danii.

Na pačatku 2000-ch ad hetych aktyvaŭ Łucenki pazbavilisia. Jany zanialisia vytvorčaściu karmoŭ dla žyviołahadoŭli i pabudavali try alejnaekstrakcyjnyja zavody ŭ Kalininhradskaj vobłaści. Na siońniašni dzień HK «Sadružnaść» — najbujniejšy ŭ Rasii pastaŭščyk sojevych baboŭ i vytvorca raślinnych alejaŭ, u tym liku sojevaha. Zavody raźmieščanyja ŭ Rasii, Danii i Brazilii. «Sadružnaść» taksama raźvivaje łahistyčny biznes: buduje terminały dla pieravałki sielhaspradukcyi (u pryvatnaści, u Kalininhradzie vałodaje terminałam dla pieravałki trapičnych raślinnych alejaŭ). U «Sadružnaści» niekalki pryčałaŭ hłybakavodnaha terminała ŭ Kalininhradzie, jaki dazvalaje adnačasova apracoŭvać šeść sudoŭ z hruzaabarotam da 70.000 t raślinnych alejaŭ i zbožžavych hruzaŭ u sutki.

Va ŭłasnaści «Sadružnaści» znachodzicca najbujniejšy ŭ Rasii park śpiecyjalizavanych čyhunačnych vahonaŭ. U 2012 hodzie japonski trejdar Mitsui & Co. nabyŭ 10% akcyj hrupy, acaniŭšy jaje ŭ 2,2 młrd. dalaraŭ. 90% zastajecca ŭ Alaksandra i Natalli Łucenkaŭ.

HK «Sadružnaść» maje handlovy biznes u Biełarusi («Impekśsiervis»), źjaŭlajučysia adnym z najbujniejšych pastaŭščykoŭ karmoŭ dla biełaruskaha ahrapramysłovaha kompleksu. Jaho ŭznačalvaje brat Natalli Łucenka.

Jašče adna daččynaja kampanija chołdynhu «Biełahraterminał» u 2012—2013 hadach nabyła dźvie placoŭki ŭ Viciebskaj i Hrodzienskaj vobł. dla budaŭnictva bujnych ahrałahistyčnych terminałaŭ. U 2011 hodzie «Sadružnaści» była adviedzienaja terytoryja ŭ Lidzie dla budaŭnictva alejnaekstrakcyjnaha zavoda.

U 2013 hodzie «Forbs» upieršyniu ŭklučyŭ suzasnavalnika hrupy Alaksandra Łucenku ŭ suśvietny rejtynh miljarderaŭ.

U dakumientach IFC (Mižnarodnaj finansavaj karparacyi), datavanych 2007 hodam, jon i jaho žonka nazvanyja hramadzianami Biełarusi.

U lutym 2015 «Sadružnaść» ŭračysta adkryła novuju štab-kvateru ŭ Luksiemburhu. U sakaviku 2015 Alaksandr Łucenka staŭ hienieralnym dyrektaram kampanii — Stefan Frapie, jaki zajmaŭ hety post, padaŭ u adstaŭku. Vyručka kampanii ŭ 2014 hodzie skłała $ 2,7 młrd (rost 34%).

U Natalli i Alaksandra dvoje dziaciej. Ich dačka Alena ŭvachodzić u radu dyrektaraŭ hrupy, jakuju ŭznačalvaje Alaksandr Łucenka.

Darečy, pa infarmacyi taho ž «Forbs», padčas žnivieńskaha abvału fondavych rynkaŭ bolš za ŭsich z rasijskich miljarderaŭ straciŭ mienavita Alaksandr Łucenka (77 miesca ŭ rejtynhu rasijskaha «Forbs»). Časopis paviedamlaje, što Łucenka straciŭ $233 młn i, pavodle dadzienych na 25 žniŭnia, jaho majomaść składała $983 młn.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?