Dziakujučy pierachodu na płavajučy kurs rubla ŭdałosia pierakanać nasielnictva, što ź im nie hulajuć u hulni. Pra heta siońnia zajaviŭ Alaksandr Łukašenka, prymajučy z dakładam staršyniu praŭleńnia Nacyjanalnaha banka Paŭła Kałaŭra.
Pavodle źviestak za vosiem miesiacaŭ, biełarusy na najaŭnym rynku pradali valuty na $362 młn bolš, čym kupili. Siarod jurydyčnych asob popyt na valutu pierasiahnuŭ prapanovu tolki ŭ žniŭni, heta było źviazana ź nieabchodnaściu pahašać valutnyja kredyty.
«Dziakujučy tamu, što my pierajšli na płavajučy kurs i ni ŭ jakim razie štučna nie strymlivajem kurs nacyjanalnaj valuty adnosna inšych valut, nam usio ž taki ŭdałosia pierakanać nasielnictva, što my ź im u hulni hulać nie budziem. I heta pravilna, nam treba prytrymlivacca takoj pazicyi», - padkreśliŭ Alaksandr Łukašenka. Jon adznačyŭ: «Zvyčajnyja ludzi ŭ nas usio mohuć kupić u Biełarusi za biełaruskija rubli».
Kiraŭnik dziaržavy ličyć, što Nacbanku i ŭradu nie treba źviartać uvahu na krytyku, što hučyć u ich adras, nakont ručnoha režymu kiravańnia ekanomikaj.
«Jakoje chočacie prymianiajcie kiravańnie, tolki b ad hetaha byŭ vynik — siońnia nie da raskošy, — skazaŭ jon.
— U nas napieradzie, mahčyma, jašče bolš składanyja časy, i daj boh nam voś tak prajści, jak my siońnia idziom. Situacyja ŭ śviecie ad nas nie zaležyć. My pavinny da jaje prystasavacca, i my heta pavinny razumieć».
U Biełarusi adnosna spakojnaja situacyja va ŭsich siehmientach ekanomiki, u tym liku ŭ valutnaj śfiery, stabilnaja i pradkazalnaja hrašova-kredytnaja palityka, kanstatavaŭ jon. «Heta naša ščaście. Voś hety trend treba zachavać», — padkreśliŭ jon.