Zbornaja Biełarusi pa futbole zhubiła ŭsie šancy na vychad na čempijanat Jeŭropy – 2016. Adnak u kalendary zastavałasia jašče try matčy – chatnija ź Luksiemburham i Makiedonijaj dy haściavy sa Słavakijaj.

Adsutnaść intryhi pryviało da taho, što trybuny «Barysaŭ-Areny» nie byli zapoŭnienyja i na pałovu. I heta pry nie samych złych cenach na bilety. Šmat chto machnuŭ na zbornuju rukoj. Navat na siektary «B-12» było niašmat.

Chackievič źmianiŭ pałovu startavaha składu ŭ paraŭnańni z matčam z Ukrainaj. Na varotach vyjšaŭ Juryj Žaŭnoŭ. U starcie źjaviŭsia naš brazilec Renan Bresan, adbyŭ dyskvalifikacyju Maksim Bardačoŭ. Taksama ŭ pieršych adzinaccaci źjavilisia našy «rasijanie» Stas Drahun i Pavieł Niachajčyk.

Jašče za dzień da hulni nie było zrazumieła, ci jana adbudziecca. Sprava ŭ tym, što ŭ niadzielu bolšaja častka luksiemburžcaŭ niečym atruciłasia. Našy supierniki navat źviartalisia ŭ UEFA z prośbaj pieranieści hulniu.

Luksiemburžcy tradycyjna niazručnyja dla nas kankurenty. Vosieńniu 2007 hoda jany pieramahli kamandu Biernda Štanhie ŭ Homieli. A ŭ hetym adbory biełarusy ledźvie vyratavalisia ŭ druhim tajmie, źvioŭšy hulniu ŭničyju.

Skazać, što i na hety raz hulnia lohka skłałasia dla biełarusaŭ, nielha. Našy chłopcy nie tak časta pahražali ŭładańniam Žubiera. U pačatku hulni dobra va ŭpor hałavoj prabiŭ Karnilenka, u tym momancie varatar spraviŭsia, ale dva nastupnyja ŭdary ŭ stvor stali rakavymi dla luksiemburžcaŭ.

Abodva hały za našu kamandu zabiŭ paŭbaronca BATE Michaił Hardziajčuk. U pieršy tajmie ŭ jaho atrymaŭsia nie samy efiektny ŭdar, ale pa dziŭnaj trajektoryi miač usio ž jurknuŭ u varoty.

A ŭ druhim tajmie Hardziajčuk skarystaŭsia pieradačaj Siarhieja Kiślaka, trapna prabiŭšy ŭ blizki vuhał – 2:0.

Naša kamanda atrymała pieramohu, ale celnaj hulnioj, na žal, znoŭ nie paradavała. Navat na fonie nie samaha mocnaha supiernika.

Siońnia ŭ hrupie: Słavakija — Ukraina — 0:0, Makiedonija — Ispanija — 0:1.

Paśla 8 turaŭ: Ispanija — 21, Słavakija — 19, Ukraina — 16, Biełaruś — 7, Luksiemburh — 4, Makiedonija — 3.

Nastupny matč biełarusy zhulajuć u haściach sa Słavakijaj 8 kaastryčnika, a zavieršać adboračny turnir 12 kastryčnika damašnim matčam z Makiedonijaj.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?