Patencyjny kandydat u prezidenty Mikałaj Ułachovič u kamientary TUT.BY nazvaŭ «brudnaj i niadobraj spravaj» i «palityčnaj pravakacyjaj», staronku, jakaja źjaviłasia ŭ fejsbuku i na jakoj publikavalisia zajavy niby ad jaho imia.
Mikałaj Ułachovič, fota Siarhieja Hudzilina
«Pavažanyja vybarščyki. Pavažanyja hramadzianie Respubliki Biełaruś, jakija pojduć na vybary. Ja zapeŭnivaju vas, što nikoli nijakaj staronki ŭ sacyjalnych sietkach ja nie adkryvaŭ. Usie staronki, stvoranyja pad maim imiem, nijakaha dačynieńnia da mianie nie majuć», — skazaŭ lidar biełaruskich kazakoŭ.
Pa słovach Ułachoviča, jaho akaŭntaŭ u sacyjalnych sietkach nie źjavicca i paśla rehistracyi kandydatam u prezidenty. Pieradvybarčy štab Ułachoviča, pavodle jaho słoŭ, da hetaj staronki ŭ fejsbuku taksama dačynieńnia nie maje.
«Tamu prašu ŚMI nie pisać adsiabiecinu, nie ŭzhadniŭšy sa mnoj. Usio heta pa vialikim rachunku palityčnaja pravakacyja. Choć ja navat pravakacyjaj heta nazvać nie mahu. Heta brudnaja i niadobraja sprava», — zajaviŭ Ułachovič.
Supołka «Ułachovič Mikałaj» źjaviłasia ŭ fejsbuku jašče ŭ siaredzinie žniŭnia. Z pačatku vieraśnia tam stali źjaŭlacca zajavy «ad imia» pretendenta na prezidenckuju pasadu, jakija raspaŭsiudžvalisia ŭ ŚMI jak zajavy samoha Ułachoviča.
U supolnaści prapanoŭvałasia pieraličvać hrošy na rachunak stvoranaha ŭ jaho padtrymku vybarčaha fondu (ź viernymi dadzienymi). Akramia taho, stvaralniki supołki publikavali zajavy ad imia Ułachoviča ŭ vyhladzie ilustracyj.
P.S. ad Redakcyi «NN». Varta adznačyć, što «Naša Niva» prasiła Mikałaja Ułachoviča prakamientavać fakt źjaŭleńnia staronki ŭ Fejsbuku, jak tolki pra jaje stała viadoma. Pieršy raz jon padniaŭ słuchaŭku i admoviŭsia havaryć, spasłaŭšysia na toje, što jon na naradzie. Paśla ž jon čatyry razy nie adkazaŭ na telefanavańni.
