Sprava aviečka Doli, pieršy ŭ śviecie kłon žyvioły. Adroźnić kłon ad zvyčajnaj žyvioły niemahčyma. Fota: Reuters
Jeŭrapiejski parłamient prahałasavaŭ za piermanientnuju zabaronu kłaniravańnia ŭsich sielskahaspadarčych žyvioł i zabaronu ŭvozu miasa, małaka i inšych praduktaŭ ad kłaniravanych žyvioł i ich naščadkaŭ u ES, paviedamlaje Bllomberg.
Jeŭraparłamient prytrymlivajecca palityki «lepiej zabaranić, čym potym škadavać» adnosna biaśpieki charčavańnia. Nacyjanalnyja ŭrady ž mohuć nie pryniać normy, zaćvierdžanyja Jeŭraparłamientam, z ekanamičnych ci inšych nahod.
Zakonaprajekt u Jeŭraparłamiencie padtrymali 529 deputataŭ, suprać prahałasavali 120, jašče 57 ustrymalisia. Hałoŭny arhumient suprać — niedaskanałaść techniki kłaniravańnia, vysokaja śmiarotnaść siarod kłaniravanych žyvioł.
Rašeńnie Jeŭraparłamienta kanfliktuje z ułasnymi zakonami krain ES. Ciapier jano budzie razhladacca nacyjanalnymi ŭradami, jakija mohuć pasprabavać uchilicca ad žorstkich norm. Tak, u 2011-m nacyjanalnyja ŭrady admovili prapanovu Jeŭraparłamienta pa zabaronie prodažu miasa naščadkaŭ kłaniravanych žyvioł.
Ci niebiaśpiečnaje miasa kłaniravanych žyvioł? Padobna, što nie: pavodle ŭsich daśledavańniaŭ jano identyčnaje zvyčajnamu miasu i nie niasie ryzyki spažyŭcu. Dy ad kłaniravańnia cierpiać sami žyvioły.
Chacia kłaniravańnie zanadta darahoje, kab ź jaho dapamohaj vyrablać miasa dla rynku, jano cikavaje razvodčykam: možna atrymać kankretnyja hienietyčnyja mutacyi (naprykład, bolš miasa na kostkach) i ŭkaranić ich u parodach žyvioł. Vynik taki ž, jak ad zvyčajnaha vyviadzieńnia novych parod, tolki chutčejšy.
Na siońniašni dzień u Jeŭropie miasa kłaniravanych žyvioł mahło apynucca ŭ talercy bieź viedama spažyŭca, piša Deutsche Welle. Nijakaj admysłovaj markiroŭki nie patrabujecca. Dy naŭrad ci spažyviec pakaštuje miasa kłaniravanych žyvioł — to zanadta doraha. Chutčej na talerki trapić miasa naščadkaŭ takich žyvioł. Dola rynku takoha miasa nieviadomaja, ale jana maje być dastatkova nizkaj.
Kłaniravanyja žyvioły čaściej chvarejuć, čaściej naradžajucca chvorymi. Krytyki kłaniravańnia śćviardžajuć, što prablemy sa zdaroŭjem majuć i surahatnyja matuli kłonaŭ. Daśledčyki tym časam kažuć, što naščadki kłonaŭ nie majuć niejkich śpiecyfičnych prablem sa zdaroŭjem.
Pavodle apytańniaŭ, sami jeŭrapiejcy chutčej vystupiać za markiravańnie praduktaŭ ad naščadkaŭ kłonaŭ, čym za poŭnuju ich zabaronu.
U zaležnaści ad rašeńniaŭ nacyjanalnych uradaŭ, inicyjatyva Jeŭraparłamienta moža skončycca jak zabaronaj, tak i tolki markiravańniem. Albo navat zachavańniem «status-kvo» na doŭhi čas.
