— Jak vy adčuvajecie siabie pierad telekamerami? Nie sakret, što vašy pieršyja videaintervju byli nie nastolki ŭdałyja, jak vam by chaciełasia. Udałosia niešta palepšyć?
— Ja spadziajusia na heta. Ale nasamreč ja chvalujusia vielmi mocna.
— Pieršaje pytańnie samaje kanceptualnaje — čamu vy ŭdzielničajecie ŭ hetych vybarach?
— Samaje hałoŭnaje — nielha kazać, što Biełaruś znachodzicca ŭ niejkaj stabilnaści. Jość kryzis. I siońniašniaja stratehija ŭładaŭ — ihnaravać hołas hramadzianaŭ, ničoha nie rabić. Navat zrabić tak, kab my, hramadzianie, płacili za toje, što niama nijakaj stratehii. Mienavita tamu ja ŭdzielničaju ŭ hetych vybarach, kab raspačać pieramieny. Jany vielmi nam usim patrebnyja. Kab zabiaśpiečyć vychad z kryzisu, kab zabiaśpiečyć dabrabyt kožnaj siamji, kab u kožnaha z nas źjavilisia novyja mahčymaści.
— Za hetyja tydni šmat razoŭ hučali mierkavańni, što svaim udziełam vy hulajecie na baku ŭłady, što vy prajekt ułady, navat kali vy sami hetaha nie ŭśviedamlajecie. Što vy na heta adkažacie?
— Bolš za 107 tysiač čałaviek padpisalisia za majo vyłučeńnie, davieryli mnie być kandydatam u prezydenty. Voś heta dla mianie samaje hałoŭnaje. Ja — čałaviek ad ludziej, ad narodu.
— Ci źjaŭlajeciesia vy apazycyjnym kandydatam? Apazycyjny kandydat — toj, jaki stavić za metu źmianić uładu. Vy, zdajecca, dahetul svaju metu mienavita tak dakładna nie sfarmulavali. Dyk ci možna vas nazyvać apazycyjnym kandydatam?
— Tak. Ja — demakratyčny apazycyjny kandydat.
— Ci stavicie vy na mecie mienavita nie maleńkija źmieny, palapšeńni žyćcia, a hałoŭnaje — źmienu ŭłady?
— Kaniečnie. Samaja hałoŭnaja meta — kab ułada pavažała ludziej na kožnym uzroŭni. My kažam, što treba viarnucca da dvuch terminaŭ prezydenctva, pra toje, što treba abirać i miascovuju ŭładu, viarnuć uładnyja paŭnamoctvy parlamentu.
— Ale ŭsie my viedajem, jakija vyniki ahučyć CVK 11 kastryčnika. Abo ŭ vas jość niejkija sumnievy na hety kont?
— Tak skłałasia na siońnia, što ja — adziny demakratyčny kandydat. Sacyjalohija pakazvaje, što 30 pracentaŭ hatovyja prahałasavać za demakratyčnaha kandydata. Nie sakret, što častka ź ich na vybary nia pojdzie, ale bolšaść pryjdzie. Rejtynh Łukašenki davoli stabilny, ale jon moža jaho stracić, kali sytuacyja ŭ ekanomicy praciahnie paharšacca. Tamu ludzi, jakija vahajucca — ja ŭpeŭnienaja, prahałasujuć za pieramieny. Kali ŭsio heta padsumavać, to možna skazać, što za demakratyčnaha kandydata mohuć prahałasavać bolš za 20 pracentaŭ. A kali kryzis praciahniecca, to i bolš.
— I vy dumajecie, što CVK abvieścić, što vy atrymali 20–30 pracentaŭ?
— Ja nie harantuju, što abvieścić CVK. Ja apeluju da peŭnych dadzienych. A što budzie praź miesiac — čas pakaža.
— U značnaj častki demakratyčnaj hramadzkaści jość pierakanańnie, što samy lepšy adkaz na hetyja vybary — u ich nia ŭdzielničać. Ci vy razhladajecie varyjant — źniacca?
— Moj adkaz — nie. Bolš za sto tysiač ludziej, jakija padpisalisia za mianie, dali mnie nakaz udzielničać. Maja kamanda, jakaja ŭklučaje ŭ siabie pradstaŭnikoŭ usich partyjaŭ i ruchaŭ, taksama padtrymlivaje aktyŭny ŭdzieł u hetaj kampanii. I ja sama liču, što heta niedalnabačny krok — syści. Tym samym ja dapamahu Łukašenku. Bo kali jość alternatyva — heta vyklik režymu. Kali jaje niama — to my tolki jamu dapamožam.
— Jak vy hladzicie na hienderny aspekt u palitycy? Ciapier u sacyjalnych sietkach šmat pišuć u vašu abaronu na temu «jak možna napadać na sympatyčnuju žančynu?». Ci ličycie vy, što da žančyny pavinny stavicca niejak pa-asablivamu, ci ŭ palitycy niama połu i žančyna pavinna atrymlivać toje samaje, što i mužčyna?
— Samo hetaje pytańnie ŭžo nieaktualnaje siońnia. Ja vystupaju za roŭnyja pravy, i kab heta nie było adzin dzień u hodzie, 8 sakavika. Tamu liču, što palityka — heta takaja ž dziejnaść, jak i astatnija, i tut u mianie takija samyja pravy, jak u mužčynaŭ. Pahladzicie navokał — žančyny kirujuć siemjami, tam u nas matryjarchat, šmat žančyn zajmajuć kiroŭnyja pasady. Z hetaha vidavočna vynikaje, što žančyna moža być prezydentam. Mnohija stavili podpisy za mianie i kazali: «Da čaho daviali krainu hetyja mužčyny!».
— Tady ci možna vas nazvać feministkaj (što b vy ni ŭkładali ŭ hetaje słova)?
— Atrymlivajecca, što kali ja za roŭnyja pravy, to ja feministka. Ale bolšaść ludziej siońnia nie razumiejuć hetaha paniaćcia. I ja budu pradstaŭlać naroŭni hałasy jak mužčynaŭ, hetak i žančynaŭ, jakija prahnuć pieramienaŭ.
— Kali da vašaha pikietu padychodziać ludzi i padpisvajucca sa słovami «voś sympatyčnaja žančyna, ja za jaje padpišusia» — jak vy da hetaha staviciesia? Ci adčuvajecca tut niejki dyskamfort, abo kožny vybarščyk patrebny i jahonyja matyvy nia važnyja?
— Heta pieršaje ŭražańnie. Vy mianie sustreli i robicie pieršyja vysnovy — pryjemny čałaviek ci nie, daviarajecie jamu ci nie. A dalej užo idzie nastupny etap usprymańnia asoby — jaje dumki, kaštoŭnaści. Tamu — dla pieršaha ŭzroŭniu, pieršaha dotyku — heta narmalna. Heta nie abražaje.
— Davoli zrazumieła, jakija vyniki mohuć być dla vas asabista i dla vašaj kampanii ad udziełu ŭ prezydenckich vybarach. A voś jakija vyniki dla krainy? Ci vy pastavicie niejkaje pytańnie rubam, nastolki rezka, što ŭłada vymušanaja budzie na heta reahavać?
— Samaje hałoŭnaje, čaho my chočam damahčysia, — kab hołas hramadzianaŭ byŭ pačuty. My ličym, što ŭłada nia zdoleje ihnaravać našy patrabavańni. My ličym, što siońnia tym ludziam, jakija va ŭładzie, treba źniać hadzińnik, zakasać rukavy i pačać pracavać na budučyniu. Nam siońnia treba prybrać tyja marazmy, jakija jość u ekanomicy — ukaz pra darmajedztva, abmiežavańni impartu, padatak na pazyki i šmat čaho inšaha. A samaje hałoŭnaje — padtrymać raźvićcio inicyjatyvy, kab ekanomika pracavała i my pačali zarablać hrošy. U nas vielmi vysokija ceny, my nibyta žyviem u raźvitaj krainie. A ŭ rehijonach, kali razmaŭlaješ ź ludźmi, akazvajecca, što zarobak try miljony — heta za ščaście.
— Heta ŭžo niešta kankretnaje. Bo z raniejšych vašych zajavaŭ, dyj u hetym interviju vyhladaje, što vy za ŭsio dobraje i suprać usiaho drennaha. Ale palityk nia moža adlustroŭvać usie mierkavańni, musić na niečym kancentravacca. Ci jość u vas niejkija namiotki, jakija stratehičnyja mety buduć hałoŭnymi ŭ vašaj kampanii?
— Viadoma, jość. Heta realny neŭtralny status krainy, heta reformy ŭ ekanomicy, jakija b stvaryli pryjazny klimat dla investycyjaŭ, realnaja sacyjalnaja abarona i palityčnaja reforma, nakiravanaja na vybarnaść ułady ludźmi.
— U presie prahučała, što vy nibyta hatovyja zaniać niejkuju pasadu ŭ vykanaŭčaj uładzie ŭ vielmi imaviernym vypadku vašaj niepieramohi na vybarach. Ci vy pa-raniejšamu tak ličycie, ci vas niapravilna pracytavali?
— Ja nikoli tak nie ličyła. Treba być realistam. Nikoli hetaja ŭłada nie prapanoŭvała ludziam ź inšymi pohladami nijakija pasady. Dośvied taksama pakazvaje, što ty adzin nia možaš ničoha zrabić — ty traplaješ u systemu i tam hublajeśsia. Tamu ja zastajusia z našaj kamandaj i budu praciahvać iści da našych metaŭ.
— Što i dzie vy budziecie rabić 11 kastryčnika ŭviečary?
— Ja budu sa svajoj kamandaj. My budziem čakać vynikaŭ, ja budu dziakavać usim tym, chto budzie dapamahać mnie ŭ kampanii, dźviery našaha ofisa buduć adčynienyja. I, viadoma, my budziem čakać verdyktu kampanii nazirańnia «Prava vybaru».
— U maim pytańni byŭ namiok, jakoha vy nibyta nie zaŭvažyli. Ja mieŭ na ŭvazie: kali ludzi vyjduć 11 kastryčnika na Płošču, ci vy budziecie tam?
— Viedajecie, takoha nastroju ciapier u hramadztvie niama. Davajcie pahladzim, jak budzie iści etap ahitacyi. A potym budziem adkazvać na hetaje pytańnie.
