Fota TASS
U pamiežnaj słužbie Ukrainy paviedamili ab zatrymańni dvuch rasijskich hramadzian na ŭčastku adździeła «Miełovoje» supracoŭnikami Łuhanskaha pahraničnaha atrada.
U rasijskim ministerstvie abarony raniej zajavili ab vykradańni rasijskaha vajskoŭca i jaho brata z terytoryi Rastoŭskaj vobłaści. «12 vieraśnia kala 6 hadzin ranicy z nasielenaha punkta Čartkova Rastoŭskaj vobłaści supracoŭnikami ŭkrainskich śpiecsłužbaŭ byŭ vykradzieny i vyviezieny na terytoryju Ukrainy rasijski vajskoviec-kantraktnik Viktar Barsukoŭ», — cytuje Interfaks pres-słužbu Minabarony Rasii.
Jak pieradaje TASS, infarmacyju ab vykradańni rasijskich hramadzian kamandavańnie vajskovaj častki atrymała ad svajakoŭ, jakija pražyvajuć u Čartkovie, u jakich haściavali braty Barsukovy. Minabarony taksama zapatrabavała nieadkładna vyzvalić rasiejcaŭ.
Va ŭkrainskim pamiežnym viedamstvie, adnak, paviedamili, što braty Barsukova niezakonna pierasiekli dziaržaŭnuju miažu Ukrainy, za što i byli zatrymanyja.
Pa słovach pradstaŭnikoŭ Dziaržpahransłužby, jany byli apranutyja ŭ vajennuju formu biez znakaŭ adroźnieńnia i pavodle dakumientaŭ akazalisia rasijskimi hramadzianami.
«Padčas pravierki adzin z mužčyn mieŭ pry sabie ŭnutrany pašpart RF, a druhi — vajenny bilet, zhodna ź jakim jon źjaŭlajecca vajennasłužačym VS Rasii ŭ adnoj z vajskovych častak z Varoniežskaj vobłaści», — havorycca ŭ paviedamleńni pahransłužby Ukrainy.
Va ŭkrainskaj pahransłužbie paviedamili, što parušalnikaŭ dastavili ŭ pamiežnaje padraździaleńnie i prainfarmavali ab hetym rasijski bok.
Nasieleny punkt Čartkova Rastoŭskaj vobłaści prymykaje da ŭkrainskaha pasiołka Miełavoje Łuhanskaj vobłaści i adździeleny ad jaho čyhunkaj.