fota Alaksandra Vasiukoviča, Tut.by
Vizavyja centry pa ŭsioj krainie spynili pryjom dakumientaŭ ad klijentaŭ i časova prypynili pracu. Pryčyna — u novych praviłach praviadzieńnia valutnych apieracyj, pryniatych Nacbankam. Hety dakumient siońnia ŭstupiŭ u siłu. Siarod inšaha jon zabaraniaje pasiarednikam brać z klijentaŭ konsulski zbor u jeŭra abo ŭ dalarach, jak heta było raniej. Usie raźliki — tolki ŭ biełaruskich rublach.
«Zaraz my nie prymajem dakumienty. Sprava ŭ tym, što siońnia ŭstupiła ŭ siłu novaja pastanova Nacyjanalnaha banka, i vizavyja centry ciapier nie majuć prava prymać konsulski zbor ad klijentaŭ u zamiežnaj valucie. Ciapier heta pytańnie vyrašajecca», — tłumačać u vizavym centry Litvy ŭ Minsku.
Takuju ž infarmacyju paviedamlajuć klijentam i ŭ daviedačnych słužbach vizavych centraŭ Ispanii i Hrecyi. Ich filijały prypynili pryjom dakumientaŭ pa ŭsioj krainie.
U Nacyjanalnym banku paćvierdzili, što z hetaha času vizavyja centry mohuć prymać ad klijentaŭ tolki rubli. Jakim čynam jany buduć raźličvacca z pasolstvami i dzie voźmuć dla hetaha valutu — partniory pavinny damovicca pamiž saboj samastojna.
Raniej vizavyja centry prymali ad klijentaŭ servisny zbor za svaje pasłuhi ŭ rublach, a konsulski zbor — u zamiežnaj valucie. Zaraz usie raźliki ŭ dalarach i jeŭra zabaronienyja.
Pry hetym sami dypłamatyčnyja i inšyja aficyjnyja pradstaŭnictvy zamiežnych dziaržaŭ mohuć prymać da raźliku valutu.
