Siońnia apublikavana pieradvybarčaja prahrama kandydata ŭ prezidenty Alaksandra Łukašenki. Jaje nazva «Za budučyniu niezaležnaj Biełarusi». Raniej u ŚMI byli apublikavanyja prahramy Taćciany Karatkievič, Siarhieja Hajdukieviča i Mikałaja Ułachoviča.
fota Siarhieja Hudzilina
«11 kastryčnika kožnamu z vas treba budzie vybirać budučyniu. Budučyniu svaju, budučyniu dziaciej i ŭnukaŭ, budučynia ŭsioj Biełarusi»!, — adznačajecca na pačatku prahramy.
Ad vašaha vybaru zaležyć mnohaje. Bo pa sutnaści siońnia pierad krainaj usiaho dva šlachi.
Adzin šlach napierad — da zachavańnia stabilnaści i paradku, svabody i niezaležnaści. Heta šlach adzinstva i zhody, raźvićcia i prahresu. Heta šlach miru i stvareńnia.
Inšy šlach nazad — da smuty i chaosu «dzievianostych», bandyckaha kapitalizmu i dzialby ŭłasnaści, da pasłableńnia dziaržavy i straty niezaležnaści. Heta šlach revalucyi, kryvi i vajny.
Nam nielha stracić toje, što ŭžo dasiahnuta.
My za dva dziesiacihodździ niezaležnaści zrabili vielmi mnohaje.
My pabudavali svaju dziaržavu — svabodnuju i suvierennuju Biełaruś.
My žyviem u mirnaj, spakojnaj, pryhožaj, dahledžanaj krainie.
My stvaryli sacyjalnuju madel, jakaja abaraniaje prostaha hramadzianina. Źbierahli hramadstva ad aliharchaŭ i bandytaŭ.
Naša dziaržava vielmi maładaja, i naša niezaležnaść nie ŭsim pa dušy. Naša ziamla i naš zdabytak, stvoranyja pracaj usiaho naroda, pa-raniejšamu vabiać amataraŭ lohkaj nažyvy.
Tamu pierš za ŭsio my pavinny abaranić toje, što ŭžo stvorana. Svabodu i niezaležnaść Biełarusi.
Mir i paradak u krainie.
Dziaržava dla naroda, u jakoj žyć našym dzieciam i ŭnukam.
Abapirajučysia na hetyja dasiahnieńni, my možam ruchacca napierad - da materyjalnaha dastatku, dabrabytu kožnaha hramadzianina i roskvitu Biełarusi», — pieraličvajecca ŭ prahramie.
Prahrama Łukašenki zasnavana na nastupnych pryncypach: svaboda i niezaležnaść, mir i paradak, salidarnaść i spraviadlivaść, praca i dabrabyt.
Praca i dabrabyt uklučaje ŭ siabie nastupnyja punkty: baraćba ź inflacyjaj i rostam cen, novyja padychody da madernizacyi ekanomiki, efiektyŭnaje dziaržaŭnaje kiravańnie, pryciahnieńnie inviestycyj i padtrymka biznesu, adkrytaść hłabalnamu śvietu.
«Mirnaje i ščaślivaje žyćcio našych ludziej stanie hałoŭnym vynikam vykanańnia ŭsiaho zadumanaha. Biełaruś ŭmacuje svaju niezaležnaść i zrobić imklivy praryŭ u budučyniu, — reziumujecca ŭ prahramie. — Historyja nie raz dakazvała - adzinstva i metanakiravanaść ŭsiaho naroda zdolnyja rabić cudy».
«Darahija suajčyńniki! Usie hady na pasadzie prezidenta mianie padtrymlivała viera, — havorycca ŭ prahramie. — Viera ŭ Biełaruś, u naš narod, u našu budučyniu. Maju pracu aceńvać vam. Mahu skazać tolki adno.
Biełaruś — moj los. Słužeńnie joj - sens majho žyćcia.
Nie było, niama i nie budzie ŭ mianie ničoha daražej za Radzimu. I siońnia ja ćviorda viedaju.
RAZAM my stvaryli niezaležnuju Biełaruś!
RAZAM my pieraadolejem lubyja niahody!
RAZAM my pabudujem ščaślivaje i kvitniejučuju krainu! Nam niama čaho dzialić i niama čaho padzialacca.
Bo BIEŁARUŚ U NAS ADNA!
