Arhkamitet konkursu vyznačyŭ uładalnika Hran-Pry, dvuch łaŭreataŭ, a taksama adznačyŭ śpiecpryzami jašče troch vykanaŭcaŭ.
Konkurs «Zaśpiavaj 2.0» startavaŭ sioleta uviesnu. Maładym vykanaŭcam (da 27 hod) prapanoŭvałasia paŭdzielničać u dźviuch naminacyjach — «Śpiavanaja paezija» i «Kavier» (na biełaruskuju kampazicyju). Usiaho było padadziena 50 zajavaŭ: 23 — na «Kavier», 34 — na «Paeziju». Niekatoryja vykanaŭcy brali ŭdzieł adrazu ŭ abiedźviuch naminacyjach. Žury, u jakoje ŭvajšli Ihar Varaškievič, Valery Dajnieka, Aleh Chamienka, Adam Hłobus, Vital Ryžkoŭ, Maksim Žbankoŭ, Taćciana Zamiroŭskaja, Pavieł Bierahovič, Nina Šydłoŭskaja i Siarhiej Budkin vyznačyła pa šeść finalistaŭ u kožnaj z naminacyjaŭ, jakija atrymali mahčymaść vystupić užyvuju pry padtrymcy viadomych biełaruskich hurtoŭ. Ciaham usiaho leta ŭ dvoryku na płoščy Svabody, 4, na terasie kaviarni Chill Out prachodziła sieryja z 12 kancertaŭ. Niekatoryja z kankursantaŭ litaralna śpielisia z tymi vykanaŭcami, jakija ich padtrymali. Jak Navi i «Pałac», «Kolir» i Naka, Symphorine i Leibonik (i Viarenič z Byšłykievičam asobna) utvaryli šykoŭnyja tvorčyja duety. Kali kazać niepasredna pra vystupy kankursantaŭ, to ŭsie biez vyklučeńnia pastavilisia da ich ź vialikaju adkaznaściu i paradavali svajoj padrychtavaściu i naohuł tvorčaj śpiełaściu. Za takimi vykanaŭcami, jak Maryna Viarenič, Valeryja Dele, Ketevana, Vegetables, Teleport, Pauline, Navi biezumoŭna budučynia našaj muzyki.
«Na žal, adznačyć usich vartych u miežach hetaha konkursu nie ŭjaŭlajecca mahčymym. Tym nie mienš zaklikajem usich biez vyklučeńnia kankursantaŭ nie składać ruki, a pracavać nadalej, najpierš nad ułasnym, aŭtarskim materyjałam, jaki časam vyhladaje cikaviejšymi za tyja kavery, jakija jany vykonvajuć», — kaža pradusar konkursu Siarhiej Budkin.
Arhkamitet konkursu vyznačyŭ uładalnika Hran-Pry konkursu «Zaśpiavaj 2.0». Jaho atrymlivaje hurt Navi za pieśniu «Płakali vietry» na słovy Paŭluka Trusa ŭ naminacyi «Kavier» i za pieśniu «Žar-ptuška» ansamblu «Siabry» (słovy Hienadzia Buraŭkina, muzyka Eduarda Chanka). Jany atrymajuć hrašovuju ŭznaharodu ŭ pamiery 500 jeŭra.
Łaŭreatkaj konkursu «Zaśpiavaj 2.0» stała Maryna Viarenič za pieśniu «Čamu my strelisia nia ŭ čas» na vierš Taciany Dziamjanavaj u naminacyi «Śpiavanaja paezija». Śpiavačka atrymaje hrašovuju ŭznaharodu ŭ pamiery 250 jeŭra.
Łaŭreatam konkursu «Zaśpiavaj 2.0» staŭ Jaŭhien Ciarenćjeŭ (hurt Teleport) za pieśniu «Začaravanaja» ansamblu «Pieśniary» (słovy Hienadzia Buraŭkina, muzyka Ihara Łučanka). Jon taksama atrymaje hrašovuju ŭznaharodu ŭ pamiery 250 jeŭra.
Taksama arhkamitet konkursu «Zaśpiavaj 2.0» adznačaje hurt «Kolir» za pieśniu «Zastacca saboj» na vierš Andreja Alaksandrava ŭ naminacyi «Śpiavanaja paezija», Pauline za pieśniu «Malitva» na vierš Janki Kupały ŭ naminacyi «Śpiavanaja paezija» i K3tyvana za pieśniu «Skyfall» Adele u pierakładzie na biełaruskuju movu ŭ naminacyi «Kavier». Usie jany atrymajuć padarunki ad arhanizataraŭ konkursu.
Aficyjnaje ŭznaharodžańnie pieramožcaŭ i łaŭreataŭ ź mini-kancertam Navi adbudziecca ŭ kniharni «Łohvinaŭ» (pr.Niezaležnaści, 37a) 28 vieraśnia (paniadziełak) u 18.00. Uvachod volny.
Dema-viersii piesień pryzioraŭ konkursu «Zaśpiavaj 2.0» možna pasłuchać pa spasyłcy.
