Kala paŭhadziny doŭžyŭsia pikiet pamiaci źnikłych 16 hadoŭ tamu palityka Viktara Hančara i pradprymalnika Anatola Krasoŭskaha, naładžany Abjadnanaj hramadzianskaj partyjaj u centry Minska. Kala 10 aktyvistaŭ AHP trymali partrety Hančara i Krasoŭskaha, a taksama źnikłych byłoha kiraŭnika MUS Juryja Zacharanki i žurnalista Dźmitryja Zavadskaha, ściahi niekatorych arhanizacyj demakratyčnych sił Biełarusi.
U akcyi taksama ŭdzielničaŭ sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski.
Zaviaršajučy pikiet, staršynia AHP Anatol Labiedźka adznačyŭ, što hetaje mierapryjemstva nie źjaŭlajecca «akcyjaj palityčnaj struktury, a pazicyjaj hramadzian, jakija chočuć viedać praŭdu i kažuć: «My pamiatajem». «Pakul hetaja tema jość, my budziem pra jaje havaryć. Praŭda — macniej za ŭsio», — zajaviŭ palityk.
Nahadajem, na pikiecie Labiedźka źviarnuŭ uvahu, što ni ŭ vodnaha kandydata ŭ prezidenty ŭ pieradvybarnyja prahramy nie ŭklučany punkt ab tym, što vinavatyja ŭ źniknieńniach pavinny panieści pakarańnie. «My možam rabić vyhlad, što ŭ nas cyvilizavanaja kraina, što ŭ nas jość vybary. Ale budziem havaryć praŭdu nie tolki ab ekanamičnych i sacyjalnych złačynstvach, ale i ab tych, jakija tyčacca čałaviečych žyćciaŭ», — zajaviŭ jon.
Staršynia AHP Anatol Labiedźka
U chodzie pikieta staršynia AHP byŭ vymušany davać piśmovyja tłumačeńni nakont akcyi supracoŭniku milicyi. Labiedźka zajaviŭ milicyjanieru, što, na jaho dumku, dazvołu na hety pikiet jamu brać było nie treba, bo zhodna z Kanstytucyjaj u pieryjad vybarčaj kampanii jon maje prava ahitavać suprać prahram zarehistravanych kandydataŭ u prezidenty. «A ni ŭ kaho z kandydataŭ prablemy źnikłych palitykaŭ u prahramie niama», — kanstatavaŭ lidar AHP.
Jak na Anatola Labiedźku milicyja składała pratakoł FOTA i VIDEA
Supracoŭnik orhanaŭ unutranych spraŭ sprabavaŭ uziać tłumačeńni ŭ astatnich udzielnikaŭ pikieta, ale paśpieŭ tolki ŭ adnaho.
Viečaram 16 vieraśnia 1999 hoda Viktar Hančar, jaki pieršapačatkova byŭ u kamandzie Alaksandra Łukašenki i dapamoh jamu pryjści da ŭłady, a zatym pajšoŭ u apazicyju, i jaho siabar Anatol Krasoŭski pryjechali ŭ łaźniu, raźmieščanuju ŭ Minsku pa vulicy Fabryčnaj, 20. Apošni raz ich bačyli prykładna ŭ 22.35, kali abodva vyjšli z budynka i sieli ŭ «Džyp-Čeroki» Krasoŭskaha.
