Skončana śledstva pa spravie ZAT «Terabudinviest», paviedamiŭ na bryfinhu 17 vieraśnia ŭ Minsku namieśnik načalnika hałoŭnaha śledčaha ŭpraŭleńnia Śledčaha kamiteta Siarhiej Liško.
Na łavu padsudnych siaduć siem słužbovych asob kampanii, jakaja buduje dom u stalicy na vulicy Prytyckaha, 97. Jašče troje abvinavačanych znachodziacca ŭ vyšuku.
Siarod abvinavačanych — akcyjaniery i zasnavalniki, dyrektar, namieśnik dyrektara, hałoŭny buchhałtar i kiraŭniki padradnych arhanizacyj.
Nazvanyja asoby abvinavačvajucca ŭ kradziažy šlacham złoŭžyvańnia słužbovymi paŭnamoctvami, złoŭžyvańni słužbovymi paŭnamoctvami, pieravyšeńni słužbovych paŭnamoctvaŭ, a taksama ŭ niezakonnaj pradprymalnickaj dziejnaści, admyvańni materyjalnych kaštoŭnaściaŭ.
Škoda ad dziejnaści słužbovych asob skłaŭ bolš za Br3,8 młrd. Paciarpiełymi pryznanyja kala 150 hramadzian, jakija nie zmahli zasialicca ŭ kvatery.
«Niezakonna atrymany dachod skłaŭ zvyš za Br550 młn, na Br940 młn byli lehalizavanyja materyjalnyja kaštoŭnaści, atrymanyja złačynnym šlacham. Abvinavačanyja pakryli škodu na sumu Br1,3 młrd. Akramia taho, na śpiecyjalny rachunak dla zaviaršeńnia budaŭnictva pastupiła Br1,7 młrd», — dadaŭ Siarhiej Liško.
Na majomaść abvinavačanych (ziamielnyja ŭčastki, nieruchomaść, aŭtamabili) na ahulnuju sumu zvyš za Br20 młrd nakładzieny aryšt.
Budaŭnictva doma pa vulicy Prytyckaha ŭ Minsku, zabudoŭščykam jakoha było ZAT «Terabudinviest», pačałosia jašče ŭ 2007 hodzie. Da hetaha času daŭhabud nie zdadzieny ŭ ekspłuatacyju.
Pieršy skandał vakoł ZAT «Terabudinviest» pačaŭ razharacca ŭ 2009 hodzie, kali arhanizavanaja złačynnaja hrupa padmanuła sotni dolščykaŭ, jakija spadziavalisia stać haspadarami kvater u domie.
Viasnoj 2011 hoda sud pryhavaryŭ niekalkich supracoŭnikaŭ arhanizacyi da doŭhich terminaŭ źniavoleńnia za machlarstva, słužbovy padłoh, kradziež, lehalizacyju materyjalnych kaštoŭnaściaŭ, atrymanych złačynnym šlacham.
Praź niekalki hadoŭ sprava pryniała novy abarot. Uviesnu 2014 hoda pravaachoŭniki ŭziali pad vartu byłoha dyrektara ZAT «Terabudinviest», vyjaviŭšy fakty kradziažoŭ hrašovych srodkaŭ udzielnikaŭ dolevaha budaŭnictva sa śpiecyjalnaha rachunku arhanizacyi, na jakim akumulavalisia hrošy dolščykaŭ. Byli atrymanyja dokazy ździajśnieńnia i inšych epizodaŭ złačynnaj dziejnaści kiraŭnictvam arhanizacyi.
