Chodzić infarmacyja, što biełaruskaja hramadzianka, viadomaja jak snajpierša h. zv. «DNR» Natalla Krasoŭskaja, nibyta aryštavanaja i asudžanaja ŭ Biełarusi na 12 hadoŭ.
Adnak aficyjna paćvierdzić infarmacyju nie ŭdałosia. U KDB skazali, što im pra aryšt Natalli Krasoŭskaj ničoha nie viadoma i paraili z hetym pytańniem źviartacca ŭ Śledčy kamitet. Tam, u svaju čarhu, adkazali, što takoj infarmacyjaj taksama nie vałodajuć.
U Barysavie, u kvatery, dzie, jak mierkavałasia, Krasoŭskaja žyła da adjezdu na Danbas, z karespandentam «Našaj Nivy» spačatku admovilisia razmaŭlać, a paśla skazali, što takaja tut nie žyvie. Miž tym, jana sama nazyvała vulicu, na jakoj jana žyvie. I na toj vulicy pražyvaje tolki adna siamja z dadzienym proźviščam. Tudy i adpraviŭsia naš karespandent.
Apošni raz Krasoŭskuju bačyli ŭ Maskvie jašče ŭ śniežni minułaha hoda. Tam Natalla zajmałasia viarboŭkaj bajevikoŭ u šerahi armii h. zv. «Navarosii». Paśla hetaha śled Krasoŭskaj hublajecca.
Natalla Krasoŭskaja. Skrynšot z prapahandysckaha videa «apałčencaŭ».
Ci viarnułasia jana na Danbas? Z apošnich zhadak pra jaje ŭ internecie ŭdałosia adšukać tolki adnu, datavanuju 7 vieraśnia. Dy i toje, na davoli małačytelnym sajcie.
U artykule paviedamlajecca, što Krasoŭskaja nibyta «zafiksavanaja 22 žniŭnia na plažy kala Novaazoŭska». Pry hetym dajecca spasyłka na bajca nieviadomaha padraździaleńnia «Barsa».
U Biełarusi Krasoŭskaja tearetyčna mahła być asudžanaja adrazu pa niekalkich artykułach Kryminalnaha kodeksu. Heta 289 artykuł (teraryzm), 133 artykuł (najomnictva), 132 artykuł (viarboŭka, navučańnie, finansavańnie i vykarystańnie najomnikaŭ). Taksama Krasoŭskaja ŭ adnym sa svaich videazvarotaŭ uskosna pahražała Alaksandru Łukašenku, što taksama moža paciahnuć za saboju kryminalnuju adkaznaść.
