Viktar Ciareščanka, jakoha Centrvybarkam nie zarehistravaŭ kandydatam u prezidenty Biełarusi, maje dokazy taho, što jaho atrucili. Pra heta jon zajaviŭ na pres-kanfierencyi ŭ Minsku 17 vieraśnia.
Viktar Ciareščanka na słuchańniach pa svaim pazovie ŭ Viarchoŭnym sudzie 16 vieraśnia.
Ciareščanka nahadaŭ, što ranicaj 28 žniŭnia jon razam z členami inicyjatyŭnaj hrupy pravodziŭ sustreču ŭ staličnym kafe «Hrunvald». Paśla vypitaj u hetaj ustanovie šklanki markoŭnaha soku jamu stała błaha. «Praz 3-4 chviliny ja adčuŭ zdranćvieńnie, serca stała praktyčna niekiravanym. Paśpieŭ dajści da tualeta, pramyć straŭnik, ale potym upaŭ i straciŭ prytomnaść», — raskazaŭ Ciareščanka.
Pavodle słoŭ Ciareščanki, napiaredadni jon razam z kalehami abmiarkoŭvaŭ płan hetaj sustrečy ŭ svaim ofisie. «Heta było zapłanavanaje mierapryjemstva, my havaryli ŭsłych, ale nie dumali, što ŭsio heta [atručvańnie] mahło być spłanavana. <…> Tut u dvary była mašyna, ažyćciaŭlali źniešniaje nazirańnie. My vyličyli jaje numar», — śćviardžaje Ciareščanka.
U adździaleńni pulmanałohii 3-j haradskoj kliničnaj balnicy, kudy paciarpiełaha adviezła 28 žniŭnia bryhada «chutkaj dapamohi», jon ačuniaŭ praz 2—3 hadziny paśla sieryi ŭkołaŭ i kropielnicy. Ciareščanka adrazu staŭ prasić uračoŭ pramyć jamu straŭnik, a taksama ŭziać uzory źmieściva straŭnika i analiz kryvi ź vieny, kab vyznačyć, što trapiła ŭ jaho arhanizm. Adnak miedyki praviali tolki ahulny analiz kryvi, uziataj z palca.
Uračy, pavodle słoŭ Ciareščanki, skazali, što ŭ jaho adbyłasia alerhičnaja reakcyja — vostry aciok Kvinkie, i šeść dzion jaho lačyli ad alerhii, u tym liku pry dapamozie harmonaŭ, choć «alerhija prachodzić za dzień-paŭtara». Padčas UHD unutranych orhanaŭ, zroblenaha pacyjentu 2 vieraśnia ŭ balnicy, adchileńniaŭ vyjaŭlena nie było.
3 vieraśnia Ciareščanku vypisali z balnicy pa jaho prośbie. U epikryzie napisana, što 1 vieraśnia jaho kroŭ pravieryli ŭ łabaratoryi 10-j haradskoj kliničnaj balnicy Minska, i vyniki pakazali adsutnaść alerhičnych reakcyj na pradukty charčavańnia. U balničnym liście ŭkazana, što Ciareščanka niepracazdolny ŭ suviazi z «ahulnym zachvorvańniem».
Paśla vypiski paciarpiełamu pryznačyli stacyjanarnaje nazirańnie ŭ 4-j paliklinicy ŭ mikrarajonie Viaśnianka. Pavodle słoŭ Ciareščanki, kali dziejańnie aniestezii prajšło, i jon «adčuŭ, što ŭvieś stravavod i straŭnik balić, asabliva pry hłytańni», jon vyrašyŭ samastojna prajści abśledavańnie ŭ miedustanovach.
U adnoj ź dziaržaŭnych klinik daśviedčany miedyk na ŭmovach ananimnaści pravioŭ Ciareščanku jašče adno UHD i vyjaviŭ pavieličeńnie ŭnutranych orhanaŭ. Ciareščanka taksama źviarnuŭsia ŭ adzin z pryvatnych centraŭ, pryčym zrabiŭ heta inkohnita, pad dziavočym proźviščam maci. Vyniki zandavańnia pakazali, što ŭ jaho apiečany stravavod, straŭnik i ŭčastak dvanaccacipiersnaj kiški.
Pa šyrokaje miedycynskaje abśledavańnie Ciareščanka taksama źviarnuŭsia da zamiežnych uračoŭ. Pravierka pa bolš jak 130 pakazčykach vyjaviła parušeńnie krovazvarotu mozhu, hipierfunkcyju nyrak, zapaleńnie stravavoda, straŭnika, dvanaccacipiersnaj kiški. «Taksama vyjaŭlena, što było zroblena ŭsio, kab u maim arhaniźmie ŭtvarylisia tromby», — śćviardžaje Ciareščanka. U zaklučeńni, dadaŭ jon, havorycca pra ŭździejańnie na arhanizm chimičnych preparataŭ.
Bližejšym časam Ciareščanka maje namier pravieści poŭnaje miedycynskaje abśledavańnie i lačeńnie za miažoj, a paśla papraŭki budzie damahacca razhladu ŭ hetaj spravie i stavić pad pytańnie kvalifikacyju ŭračoŭ, jakija jaho lačyli.
Viktar Ciareščanka i jaho kamanda pierakananyja, što za atručvańniem stajać śpiecsłužby.
U suviazi z hetym člen jaho inicyjatyŭnaj hrupy Siarhiej Skrabiec raskazaŭ, što ŭ zahadzia padrychtavanym śpisie davieranych asob Ciareščanki značylisia były načalnik SIZA №1 Aleh Ałkajeŭ i były načalnik milicejskaha śpiecnaza Uładzimir Baradač. «Heta ludzi, jakija adkryta zajaŭlajuć pra svajo dačynieńnie da [rasśledavańnia] źniknieńnia, zabojstva palitykaŭ», — zaŭvažyŭ Skrabiec. Jon ličyć, što najaŭnaść u kamandzie Ciareščanki nazvanych ludziej mahła stać adnoj z pryčyn atručvańnia.
«My nie čakali, što śpiecsłužbami budzie arhanizavany zamach na Viktara Ciareščanku. Heta situacyja stavić pad sumnieńnie adkrytaść, lehitymnaść vybaraŭ. Toj nacisk, jaki byŭ akazany na Viktara Ciareščanku, jaho siam`iu, biesprecedentny, my ličym heta niedapuščalnym», — padkreśliŭ Skrabiec.
Viktaru Ciareščanku było admoŭlena ŭ rehistracyi kandydatam u prezidenty, bo sa 130 tysiač podpisaŭ, sabranych u padtrymku jaho vyłučeńnia kandydatam u prezidenty i padadzienych u vybarčyja kamisii, sapraŭdnymi byli pryznanyja tolki prykładna siem tysiač. Ciareščanka pasprabavaŭ asprečyć rašeńnie CVK u Viarchoŭnym sudzie, ale sud jaho skarhu nie zadavoliŭ.
Ciareščanka taksama ŭdzielničaŭ u prezidenckich vybarach 1994, 2001 i 2010 hadoŭ, ale tolki adzin raz — u 2010-m — byŭ zarehistravany kandydatam. Tady, pavodle danych CVK, za jaho prahałasavała 1,19% vybarščykaŭ.
