Staršynia Centrvybarkama Lidzija Jarmošyna rada tamu, što Mikałaj Statkievič nie staŭ ničyjoj davieranaj asobaj na vybarach, pakolki jon, pavodle jaje słoŭ, «nie adkazvaje za svaje dziejańni». Pra heta kiraŭnik CVK zajaviła 17 vieraśnia na sustrečy sa studentami i vykładčykami Akademii kiravańnia pry prezidencie.
«U nas sprabavaŭ udzielničać u vybarach siadzielec, jamu było admoŭlena ŭ rehistracyi inicyjatyŭnaj hrupy. Ciapier jon na voli — heta spadar Statkievič, eks-kandydat u prezidenty 2010 hoda, jaki ŭznačaliŭ biesparadki na płoščy Niezaležnaści ŭ dzień vybaraŭ 19 śniežnia», — skazała Jarmošyna.
Pavodle jaje słoŭ, na momant padačy zajavy ab rehistracyi inicyjatyŭnaj hrupy dla vyłučeńnia kandydataŭ u prezidenty na ciapierašnich vybarach Statkievič znachodziŭsia ŭ miescach pazbaŭleńnia voli, i tamu ŭ jaho naohuł adsutničała vybarčaje prava. «Na siońniašni momant jon pamiłavany i znachodzicca na voli. Tamu jon prapanuje vybary, jak jon kaža, adkrucić nazad i znoŭ zarehistravać jaho hrupu. Adrazu ž mahu skazać, što navat kali b akt pamiłavańnia adbyŭsia raniej, u vybarach jon udzielničać nie moh by, tamu što ŭ nas nie mohuć być zarehistravanyja kandydatami ŭ prezidenty asoby ź nieźniataj sudzimaściu», — zajaviła kiraŭnik CVK.
Pry hetym jana ŭdakładniła, što Statkievič moža ŭdzielničać u vybarach u jakaści vybarščyka, a taksama być čyjoj-niebudź davieranaj asobaj, «kali jaho chtości pakliča da siabie ŭ kamandu». «Nichto jaho, dziakuj bohu, nie paklikaŭ. Tamu što jon prosta rviecca ŭ boj, a ŭ davieranaj asoby, skažam tak, dosyć šmat paŭnamoctvaŭ — heta praviadzieńnie sustreč z vybarščykami, arhanizacyja mitynhaŭ. Kali čałaviek nie adkazvaje za svaje dziejańni, za svaje ŭčynki, viadoma, davać jamu takija vysokija paŭnamoctvy, heta budzie, napeŭna, jaŭnym pieraboram», — ličyć Jarmošyna.
