17 vieraśnia ŭ Minskim haradskim sudzie abviaścili prysud u dačynieńni da byłoha supracoŭnika orhanaŭ unutranych spraŭ, 48-hadovaha Alaksandra Jermakova.
Padpałkoŭnik milicyi asudžany na vosiem hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu. Akramia taho, sud pastanaviŭ pazbavić jaho zvańnia i kanfiskavać majomaść.
Pakolki pasiadžeńnie prachodziła ŭ zakrytym režymie, detali kryminalnaj spravy nie vydajucca. Viadoma, što Jermakoŭ pryznany vinavatym u padbuchtorvańni pry dačy chabaru ŭ bujnym pamiery, a taksama ŭ padrychtoŭcy dačy chabaru paŭtorna ŭ bujnym pamiery i ŭ machlarstvie ŭ asabliva bujnym pamiery.
Pavodle prysudu, Jermakoŭ abaviazany pakryć ŭ dachod dziaržavy 620 200 000 rubloŭ — u stolki acanili nieabhruntavana nabytuju im vyhadu. Pa ciapierašnim kursie heta krychu bolš za 36 tysiač dalaraŭ.
Akramia taho, sud pastanaviŭ kanfiskavać u jaho aŭtamabil «Micubisi Hrandzis», haraž na vulicy Słabadskoj, 3-pakajovuju kvateru ŭ rajonie stancyi mietro «Spartyŭnaja», dačny dom i ziamielny ŭčastak pad Dziaržynskam, a taksama niekalki juvielirnych vyrabaŭ.
Viadoma, što ŭ 1997 hodzie Alaksandr Jermakoŭ atrymaŭ lhotny kredyt na budaŭnictva 3-pakajovaj kvatery ŭ mikrarajonie Malinaŭka, dadzienaja majomaść nie była aryštavana.
Pad vartaj były padpałkoŭnik znachodzicca amal dzieviać miesiacaŭ, z 22 śniežnia 2014 hoda. Na abviaščeńni prysudu prysutničali rodnyja padsudnaha i niekalki supracoŭnikaŭ milicyi.
Prysud moža być abskardžany ŭ Viarchoŭnym sudzie.
