U čaćvier, 17 vieraśnia, padčas svajho pieršaha pieradvybarčaha vystupu pa telekanale «Biełaruś-1» kandydat u prezidenty Taćciana Karatkievič paabiacała «nie dzialić ludziej na pravych i levych, ruskamoŭnych i biełaruskamoŭnych, praŭładnych i apazicyjnych».
Pavodle jaje słoŭ, kab zabiaśpiečyć Biełarusi raźvićcio, hramadzianam — pracu i pierśpiektyvy, a dzieciam upeŭnienuju budučyniu, nieabchodna «dać svabodu dziełavoj inicyjatyvie, źmienšyć umiašańnie dziaržavy ŭ ekanomiku, raźvivać novyja haliny, vyvieści z kryzisu pramysłovaść, viarnuć uładu pad kantrol hramadstva i zabiaśpiečyć sacyjalnuju abaronu tym, chto ŭ joj maje patrebu».
Palityk adznačyła, što za čas kampanii pabyvała «ŭ kožnym druhim horadzie Biełarusi, sustrełasia z tysiačami ludziej». «Usie prasili raspavieści ab ich prablemach, być ich hołasam, bo dziaržava ihnaruje mierkavańnie naroda, prablemy zvyčajnych hramadzian nikoha nie chvalujuć, dziaržava ich nie pavažaje», — skazała jana.
Karatkievič ličyć, što biełarusy ŭžo raspłačvajucca za adsutnaść reformaŭ.
«Apošnija dzieviać miesiacaŭ pakupnickaja zdolnaść zarobkaŭ padaje asabliva imkliva, — adznačyła jana. - Bolš za 70 tysiač čałaviek atrymlivajuć ich z zatrymkaj, na bujnych pradpryjemstvach skaračeńni skłali kala 15%, ludziej davodziać da kanca kantraktu i zvalniajuć. Niadaŭna ja była ŭ Biarozaŭcy, tam raźmieščany zavod «Nioman», dzie z šaści tysiač pracoŭnych miescaŭ zastałosia paŭtary tysiačy, ź piaci piečaŭ pracuje adna. Nas pałochali šokavaj terapijaj, ale ŭ vyniku šok ŭžo jość, a voś sił na terapiju niama».
Karatkievič źviarnuła ŭvahu na toje, što piać hadoŭ tamu na Usiebiełaruskim schodzie ŭłady abiacali da siońniašniaha dnia padniać zarobki da adnoj tysiačy dalaraŭ.
«Ale ciapier my ledź daciahvajem da zarpłaty ŭ 350 dalaraŭ, heta navat mienš, čym było ŭ momant abiacańnia. Ludzi zło iranizujuć: ułada zrabiła nas miljanierami, žabrakami miljanierami», — adznačyła jana.
Pa słovach Karatkievič, u krainie «hrošy abiasceńvajucca, zarobki padajuć, a voś ceny rastuć i žyćcio ŭsio daražej», adnak zamiest «reformaŭ i mirnych pieramienaŭ» ŭłada vybiraje «novyja kredyty i daŭhavuju jamu». «Čynoŭniki ŭsich uzroŭniaŭ ździajśniajuć pamyłku za pamyłkaj, ale płacić za heta pavinny my z vami», — padkreśliła jana.
Karatkievič adznačyła, što ŭłady tłumačać ekanamičnyja prablemy nastupstvam suśvietnaha kryzisu. «Ale ž suśvietny kryzis va ŭsich, dyk čamu tolki ŭ nas jon taki balučy? Heta jak epidemija hrypu: u kahości nasmark, a chtości valajecca z tempieraturaj 40 i vychodzić z surjoznymi ŭskładnieńniami. Dyjahnaz adnolkavy, a nastupstvy roznyja. Usio zaležyć ad imunitetu i siły arhanizma. Mienavita nieefiektyŭnaść našaj ekanomiki i sistemy kiravańnia stvaraje takuju situacyju, što luby «čych» u śviecie ŭ Biełarusi adhukajecca ciažkaj chvarobaj», — zajaviła kandydat u prezidenty.
Ułada vinavacić usich vakoł, ale tolki nie siabie, padkreśliła Karatkievič.
