Pryłada «Vočy» dapamoža pašyryć viedy hramadzian Biełarusi pra vybarčy praces, u dastupnaj formie raspavieści pra vybarčyja pravy i daść vybarščykam mahčymaść apieratyŭna paviedamić pra parušeńni na vybarach niezaležnym naziralnikam.
Infarmacyja ab parušeńniach, dasłanaja karystalnikami pryłady, budzie adlustravana na anłajn-karcie ElectBy.org i moža być vykarystana misijami pa nazirańni dla acenki taho, nakolki sumlennymi, svabodnymi i spraviadlivymi byli vybary prezidenta.
«Vočy» nie prosta infarmujuć vybarščykaŭ pra vybary, ale i dajuć mahčymaść raskryć parušeńni, jakija možna ŭbačyć na vybarčych učastkach, ananimna paviedamlajučy infarmacyju naziralnikam. Pryłada dazvalaje pieradać nie tolki tekstavaje apisańnie, ale i fota/videa ci aŭdyjomateryjały, a taksama apieratyŭna padzialicca hetaj infarmacyjaj u sacsietkach.
Akramia taho, «Vočy» praktyčna nie źbirajuć infarmacyju ab karystalnikach, akramia ich miescaznachodžańnia padčas infarmavańnia ab parušeńni i techničnych charaktarystykach ich telefona. Navat kali karystalnik dobraachvotna daje svaju kantaktnuju infarmacyju naziralnikam dla zvarotnaj suviazi, heta infarmacyja nie raskryvajecca i nie pieradajecca trecim asobam.
Ciapier dastupnaja viersija tolki na Android. U chutkim časie budzie zroblena biełaruskamoŭnaja viersija. Pryładu možna spampavać tut.
Treba adznačyć, što prahrama sapraŭdy zručnaja. Možna pahladzieć časta zadavanyja pytańni, možna razabracca, što źjaŭlajecca parušeńniem. Taksama možna zarehistravacca naziralnikam.
Rehistracyja parušeńnia robicca nastolki chutka, što vas nie paśpiejuć zaŭvažyć. Vy paznačajecie rajon i vybarčy ŭčastak, paznačajecie punkt parušeńnia, možacie dadać apisańnie, fota i videa. Paśla pakidajecie kantaktnyja dadzienyja (heta nieabaviazkova) i vuala — vašaje paviedamleńnie ab parušeńni zafiksavana.
