Jeŭrapiejskaja prahrama mabilnaści dla Biełarusi MOST, prezientavanaja 18 vieraśnia ŭ Instytucie Hiote, praduhledžvaje stažyroŭki 1.500 biełaruskich hramadzian u krainach ES.
Jak adznačyła na prezientacyi kiraŭnik pradstaŭnictva ES u Biełarusi Andrea Viktaryn, umacavańnie i pašyreńnie mižasobasnych adnosin — pryjarytetnaja zadača ŭ supracoŭnictvie Jeŭrasajuza i Biełarusi.
«Heta paznačana ŭ asnoŭnych dakumientach ES. Mabilnaść hramadzian źjaŭlajecca asnoŭnym elemientam ustojlivaha partniorstva. U suviazi z hetym prajekt MOST źjaŭlajecca ciapier klučavym momantam našaha supracoŭnictva ź Biełaruśsiu», — zajaviła Viktaryn.
Jana paviedamiła, što na realizacyju prajekta ES vydzieliŭ prykładna 5 młn jeŭra. «Jaho detali doŭhi čas raspracoŭvalisia i abmiarkoŭvalisia našym biełaruskim partnioram — Ministerstvam zamiežnych spraŭ Biełarusi. Prajekt vyhladaje vielmi šmatabiacalnym. Ja chaču vykazać padziaku MZS Respubliki Biełaruś za akazanuju padtrymku», — skazaŭ kiraŭnik pradstaŭnictva.
Andrea Viktaryn padkreśliła: «Prajekt startuje ŭ toj čas, kali my nazirajem stanoŭčyja zruchi ŭ našym palityčnym dyjałohu ź Biełaruśsiu».
Jana nazvała MOST biesprecedentnym pa maštabach prajektam, jaki dazvolić biełarusam, što pracujuć u roznych śfierach, paŭdzielničać u stažyroŭkach u luboj z krain Jeŭrasajuza.
Kiraŭnik pradstaŭnictva ES taksama adznačyła, što raspracoŭcy prajekta papiaredničali «doŭhija kułuarnyja pieramovy, pačatyja ŭ Brusieli».
Viktaryn vykazała padziaku pasolstvam krain ES u Biełarusi za toje, što jany padtrymali MOST i majuć namier spraścić praceduru vydačy viz jaho ŭdzielnikam.
U svaju čarhu načalnik adździeła Jeŭrapiejskaha sajuza i subrehijanalnych arhanizacyj upraŭleńnia ahulnajeŭrapiejskaha supracoŭnictva MZS Biełarusi Aleh Šłoma adznačyŭ, što ministerstva źjaŭlajecca nacyjanalnym kaardynataram prajekta.
«Z palityčnaha punktu hledžańnia chacieŭ by adznačyć, što ŭsio, što pracuje na narmalizacyju adnosin pamiž Biełaruśsiu i Jeŭrasajuzam, uklučajučy ŭsie mahčymyja instrumienty i zachady, my, zrazumieła, padtrymlivajem», — skazaŭ jon.
Ź inšaha boku, dadaŭ Šłoma, «my razhladajem prajekt MOST u jakaści adnoj z prahram u miežach raźvićcia mižnarodnaha techničnaha supracoŭnictva Biełarusi ź Jeŭrasajuzam».
Pavodle słoŭ pradstaŭnika MZS, prajekt važny z punktu hledžańnia nazapašvańnia vopytu biełaruskimi śpiecyjalistami. «Zrazumieła, što dalejšaje raźvićcio krainy patrabuje najaŭnaści adukavanych i kvalifikavanych śpiecyjalistaŭ, zdolnych na roŭnych supracoŭničać ź mižnarodnymi partniorami», — skazaŭ jon.
Kiraŭnik prajekta MOST Kłaus Bajer paviedamiŭ, što prajekt aryjentavany najpierš na ŭžo pracujučych ludziej, tamu jon nie dubliruje ŭžo dziejnyja prajekty, jakija finansuje ES.
Pavodle słoŭ Bajera, stažyroŭki buduć arhanizavanyja dla śpiecyjalistaŭ u śfiery kultury, adukacyi, navuki, technałohij i inšych halin. Mahčymyja jak indyvidualnyja, tak i hrupavyja stažyroŭki, jak karotkačasovyja, tak i doŭhaterminovyja. Padavać zajaŭki na ŭdzieł u prajekcie mohuć paŭnaletnija hramadzianie Biełarusi. Arhanizacyja stažyroŭki mahčymaja ŭ luboj z 28 krain ES, dadaŭ Bajer.
Niepasrednymi arhanizatarami prajekta vystupajuć Instytut Hiote ŭ Minsku i Brytanski saviet u Polščy. Realizacyja prajekta praciahniecca da śniežnia 2017 hoda. Płanujecca, što kožny miesiac u abmienach buduć udzielničać nie mienš jak 50 hramadzian Biełarusi.
