Viktar Ciareščanka, jaki nie staŭ kandydatam u prezidenty Biełarusi, šukaje piać tysiač jeŭra dla prachodžańnia abśledavańnia ŭ amierykanska-litoŭskim špitali ŭ Vilni, paviedamiŭ siabra jaho inicyjatyŭnaj hrupy Siarhiej Skrabiec.
Ciareščanka miarkuje, što 28 žniŭnia byŭ atručany. Razam z členami inicyjatyŭnaj hrupy jon pravodziŭ sustreču ŭ staličnym kafe «Hrunvald», paśla vypitaha ŭ hetaj ustanovie šklanki markoŭnaha soku jamu stała drenna. U adździaleńni pulmanałohii 3-j haradskoj kliničnaj balnicy, kudy Ciareščanku adviezła bryhada chutkaj dapamohi, jon ačuniaŭ praź niekalki hadzin paśla sieryi ŭkołaŭ i kropielnicy. Daktary, pavodle słoŭ palityka, kazali, što ŭ jaho adbyłasia alerhičnaja reakcyja — vostry aciok Kvinkie, i šeść dzion jaho lačyli ad alerhii, u tym liku pry dapamozie harmonaŭ, choć «alerhija prachodzić za dzień-paŭtara». Padčas UHD unutranych orhanaŭ, zroblenaha pacyjentu 2 vieraśnia ŭ balnicy, adchileńniaŭ vyjaŭlena nie było.
U adnoj ź dziaržaŭnych klinik daśviedčany miedyk na ŭmovach ananimnaści pravioŭ Ciareščanku jašče adno UHD i vyjaviŭ pavieličeńnie ŭnutranych orhanaŭ. Ciareščanka taksama źviarnuŭsia ŭ adzin z pryvatnych centraŭ, pryčym zrabiŭ heta inkohnita, pad dziavočym proźviščam maci. Vyniki zandziravańnia pakazali, što ŭ jaho apiečanyja stravavod, straŭnik i ŭčastak dvanaccacipiersnaj kiški.
«Ciareščanka źviarnuŭsia ŭ špital, kab daviedacca, kolki budzie kaštavać poŭnaje abśledavańnie, — paviedamiŭ Skrabiec. — U ich roznyja ceny, ale ŭ jaho vypadku treba zrabić śpiecyjalnyja darahija daśledavańni».
Płanujecca, što Ciareščanka pajedzie ŭ špital na nastupnym tydni. «Taki płan, što da kanca vieraśnia treba źjeździć, bo potym naohuł ničoha nie znojduć. Pytańnie terminovaje. Jamu skazali, što ŭ pieršyja sutki amal usio rastvarajecca, ale siakija-takija rečyvy možna znajści, kali chutka pryjedzie», — adznačyŭ Skrabiec.
Viktaru Ciareščanku było admoŭlena ŭ rehistracyi kandydatam u prezidenty, bo sa 130 tys. podpisaŭ, sabranych u padtrymku jaho vyłučeńnia kandydatam u prezidenty i padadzienych u vybarčyja kamisii, sapraŭdnymi byli pryznanyja mienš jak siem tysiač. Ciareščanka pasprabavaŭ abvierhnuć rašeńnie CVK u Viarchoŭnym sudzie, ale sud jaho skarhu nie zadavoliŭ.
Ciareščanka taksama ŭdzielničaŭ u prezidenckich vybarach 1994, 2001 i 2010 hadoŭ, ale tolki adzin raz — u 2010-m — byŭ zarehistravany kandydatam. Tady, pavodle danych CVK, za jaho prahałasavała 1,19% vybarščykaŭ.
