Avijakampanija «Biełavija» 18 vieraśnia pačała akcyju «Kalejdaskop» i na praciahu šaści tydniaŭ budzie prapanoŭvać pasažyram śpiecyjalnyja taryfy na rejsy z vyletam ź Minska pa 34 napramkach. Pra heta paviedamili ŭ pres-słužbie avijakampanii.
«Kožnyja siem dzion, pačynajučy z 18 vieraśnia, u prodažy pa akcyi buduć dastupny ad čatyroch da šaści roznych napramkaŭ avijakampanii», — rastłumačyli śpiecyjalisty. Źnižeńnie taryfaŭ u siarednim składaje 25 pracentaŭ. Naprykład, u Łondan košt avijabileta, uklučajučy taksy i zbory, składzie ad 261 jeŭra ŭ abodva baki, u Stakholm — 159 jeŭra, u Amsterdam — 199 jeŭra.
Pieryjad padarožža pa akcyjnych biletach - da 29 lutaha 2016 hoda, za vyklučeńniem navahodnich i kaladnych śviat (z 25 śniežnia 2015-ha da 10 studzienia 2016 hoda). Maksimalny termin znachodžańnia ŭ punkcie pryznačeńnia — adzin miesiac.
Akramia taho, u pres-słužbie paviedamili, što ŭ čas akcyi padpisčyki «Biełavija» ŭ Facebook i Instagram mohuć vyjhrać bały prahramy łajalnaści «Biełavija Lidar».
Hienieralny dyrektar AAT «Avijakampanija «Biełavija» Anatol Husaraŭ adznačyŭ: «Praviadzieńnie avijakampanijaj akcyj užo stała tradycyjaj. Śpiecyjalnyja prapanovy dazvalajuć zrabić avijapieravozki bolš dastupnymi dla pasažyraŭ, što stymuluje biełarusaŭ latać čaściej». Pavodle jaho danych, pryrost pasažyrskich pieravozak avijakampanii pa vynikach vaśmi miesiacaŭ biahučaha hoda skłaŭ 5 pracentaŭ u paraŭnańni z anałahičnym pieryjadam minułaha hoda.
