Časovaja śledčaja kamisija Viarchoŭnaj rady Ukrainy nazvała pryčynaj skandalnaj pierastrełki ŭ Mukačavie pieradzieł śfier upłyvu.
Kiraŭnik kamisii Mikałaj Pałamarčuk na pasiadžeńni parłamienta zajaviŭ, što sprečka pamiž pradstaŭnikami «Pravaha siektara» i miascovymi palitykami datyčyłasia kantrolu za patokam kantrabandy, jakaja ŭvozicca na Ukrainu praz Zakarpackuju vobłaść.
Na dumku kamisii, kanflikt spravakavali siłaviki: jany nie tolki viedali ab majučaj adbycca sustrečy, jakaja ŭ vyniku skončyłasia pierastrełkaj, ale i ŭdzielničali ŭ joj.
Mienavita kiraŭniki miascovych upraŭleńniaŭ MUS i SBU, na dumku kamisii, u značnaj stupieni spravakavali kanflikt. Na dumku Pałamarčuka, siłaviki byli asabista zacikaŭlenyja ŭ zychodzie pieradziełu śfier upłyvu.
U toj ža čas kamisija adznačaje, što hlebu dla kanfliktu padrychtavała biespakaranaść miascovych uzbrojenych hrup, jakija vykarystoŭvajuć simvoliku patryjatyčnych arhanizacyj. Napramuju Pałamarčuk hetyja hrupoŭki nazyvać nie staŭ.
Pierastrełka ŭ zakarpackim pasiołku Mukačava adbyłasia ŭ pačatku lipienia. U vyniku byli spalenyja niekalki milicejskich mašyn, zabityja try čałavieki. Ranieńni ŭ vyniku stralby atrymali jašče 14 čałaviek.
