Mikałaj Ułachovič pačaŭ svoj televizijny vystup z taho, što pieršyja chviliny havaryŭ pra siabie ŭ treciaj asobie.
Havaryŭ amal biez paŭz, nie zaŭsiody było zrazumieła, kali skančaŭ adnu frazu i pačynaŭ novuju. Vidavočna mieŭ prablemy z dychańniem, što vydavała niavopytnaść u publičnych vystupach. Biaź niejkich sensavych naciskaŭ niečakana pieraskokvaŭ da novaj temy.
Ułachovič pačaŭ svaju pramovu z systemy adukacyi, i adrazu prapanavaŭ adradzić «akciabrat» u škołach. «Vyšejšaja adukacyja nia robić čałavieka kulturnym», — zajaviŭ kandydat, i niečakana dadaŭ: «I tut ja zhodny sa spadarom Trusavym, jaki źjaŭlajecca zasnavalnikam BNF». Uvohule proźvišča «spadara Trusava» Ŭłachovič uzhadvaŭ ažno 5 razoŭ, i było nie zusim zrazumieła, jakaja ŭ hetym patreba. U adnym momancie Ŭłachovič krytykavaŭ Trusava za toje, što jon prapanoŭvaje vyvučać dakładnyja navuki na anhielskaj movie. Druhi raz — za toje, što «Trusavy» prapanujuć adarvać biełaruskuju kulturu ad ruskaj.
Temu adukacyi Ŭłachovič praciahnuŭ u takim rečyščy: «Krainie katastrafična nie chapaje kvalifikavanych rabočych. Stolki čałaviek z vyšejšaj adukacyjaj nam nie patrebna».
Niekalki chvilinaŭ vioŭ zavočnuju palemiku ź inšym kandydatam, Siarhiejem Hajdukievičam, jaki zajaviŭ, što ministry pavinny być «u poli». Ułachovič niekalki chvilinaŭ zachoplena dakazvaŭ, što niama patreby kožnamu kiraŭniku być «u poli».
Siarod surjoznych prapanovaŭ, jakija vyłučyŭ kandydat — uvieści medyčnaje strachavańnie, praparcyjnuju vybarčuju systemu, vybarnaść hubernataraŭ i meraŭ haradoŭ, sudy prysiažnych, vybarnaść milicejskich načalnikaŭ. «ŚMI prosiać bolš svabody, ale ŭ nas u krainie jaje dastatkova», — ličyć Ułachovič.
Ułachovič zajaviŭ pra nieabchodnaść pierahladu kantraktnaj systemy. «Košt kvadratnaha metru žylla na siońnia možna pamienšyć u try razy, ja heta zajaŭlaju ŭpeŭniena. A košt elitnaha žylla treba padvysić».
Niekalki razoŭ było cikava nazirać, jak Ułachovič nibyta spračajecca z tym tekstam, jaki jon čytaje z telesuflora, padpraŭlaje jaho.
U cełym stvaryłasia ŭražańnie, što heta byŭ vystup dziejača, u lepšym vypadku, rajonnaha maštabu.
Ułachovič, jak viadoma, doŭhi čas pracavaŭ u roznych strukturach vykanaŭčaj ułady. Jahony vystup daje vydatnaje razumieńnie, ź jakich kadraŭ składajecca ciapierašniaje biełaruskaje kiraŭnictva.
