Kiraŭniki haradskich i abłasnych vykankamaŭ, sudździ i milicejskija načalniki ŭ Biełarusi pavinny abiracca narodam, zajaviŭ 18 vieraśnia padčas svajho pieršaha pieradvybarnaha vystupleńnia na telekanale «Biełaruś-1» staršynia Biełaruskaj patryjatyčnaj partyi i viarchoŭny ataman RHA «Biełaruskaje kazactva» Mikałaj Ułachovič.
Palityk vykazaŭsia za ŭviadzieńnie ŭ Biełarusi instytuta prysiažnych zasiadacielaŭ, a taksama «raźvićcio miascovaha hramadskaha samakiravańnia, jakoje ni ŭ jakim vypadku nie pavinna asłablać centralnuju ŭładu». Pavodle słoŭ atamana, u Biełarusi siońnia dastatkova svabody słova, što b ni havaryli ŚMI, jakija Ułachovič «vielmi pavažaje».
«Ja vystupaju za libieralizacyju hramadska-palityčnaha žyćcia ŭ Biełarusi, — skazaŭ ataman. — Nieabchodna pačać partyjnaje budaŭnictva, stvaryć pry prezidencie hramadska-palityčnuju pałatu, jakaja składajecca z pradstaŭnikoŭ usich słajoŭ nasielnictva krainy. Ja za pierachod da źmiašanaj vybarčaj sistemy».
U toj ža čas palityk adchiliŭ ideju abmiežavać kolkaść dapuščalnych prezidenckich terminaŭ dla adnoj asoby, a taksama raźvivać u krainie sistemu elektronnaha ŭrada. Ułachovič taksama vystupiŭ za skaračeńnie dziaržaparatu.
Lidar patryjatyčnaj partyi ličyć nieabchodnym pravieści reformu padatkovaj sistemy, pry jakoj źniziacca staŭki i kolkaść padatkaŭ, a padatkovaje zakanadaŭstva sprościcca. Mały i siaredni biźnies, pryvatnaja inicyjatyva, pavodle jaho słoŭ, u cełym majuć patrebu va ŭsiebakovaj dziaržaŭnaj padtrymcy.
Akramia taho, u Biełarusi nieabchodna «bolš šyroka vykarystoŭvać akcyi i inšyja kaštoŭnyja papiery», a taksama pryciahvać inviestycyi praz «udaskanalvańnie i libieralizacyju zakanadaŭstva».
Ułachovič nahadaŭ, što Łukašenka na zary svajoj prezidenckaj karjery mieŭ namier zamianić mnohich čynoŭnikaŭ, ale, «pryhledzieŭšysia, jon staŭ rabić upor na prafiesijanałaŭ». Jon paraŭnaŭ taki padychod ź situacyjaj u ZŠA, dzie «prezidenty mianiajucca, a pravieranyja słužby zastajucca».
«Razumnaha i dobraha kiraŭnika», pavodle jaho słoŭ, treba «hadavać minimum 20 hadoŭ — ad majstra da dyrektara». «Ja tolki suprać pratekcyi ŭ kadravaj palitycy dziaržavy, dziejny prezident sprabuje z hetym zmahacca», — zaŭvažyŭ Ułachovič.
Niahledziačy na taki padychod da kadraŭ, pieršym rašeńniem Ułachoviča, kali jon stanie prezidentam, budzie ŭkaz ab adstaŭcy ŭrada.
«Mir i paradak u krainie — heta naš asnoŭny łozunh, pad jakim ja idu ŭ prezidenty Respubliki Biełaruś», — padsumavaŭ ataman.
